أحيت الفنانة ليلى علوي الذكرى الثامنة لرحيل والدتها، بكلمات مؤثرة، عبّرت فيها عن اشتياقها الكبير وحزنها المستمر لفقدانها.
وكتبت ليلى علوي: «النهارده الذكرى الثامنة لأمي، الله يرحمها ويعفو عنها، ويرحم ويعفو عن كل الأمهات والأموات جميعًا.. النهارده كأني عشت نفس اليوم اللي مرّ عليا في 25/8/2017، يمكن الشهر كله، العمر كله، شايفاها وحساها».
وأضافت عبر حسابها على منصة «إكس»: «كأني عايشة بضحك وببكي وبدعيلها، وحشتني أوي ومفتقداها أوي، والوجع على فراقها لسه زي ما هو».
تابعت: «بس اللي بيهون عليا شوية إني مطمئنة عليها، لأنها كانت إنسانة راقية ومؤمنة بالله وبتعمل خير كتير، وتعبت جدًا جدًا في تربيتنا، كانت أم صالحة بمعنى الكلمة، وشالت كتير وربّتنا بما يرضي الله.. أحسن تربية في الأخلاق والمبادئ والدين. اتعلمت القرآن علشان تعلّمهولنا».
واختتمت رسالتها: «بيتهيألي إنها في مكان كويس جدًا. أرجو منكم تقروا لها الفاتحة وتدعوا لها، وتدعوا لكل الأمهات.. لأن الأم دي أسمى شيء في الوجود، وهي معنى الحياة الحقيقي. الله يرحمها ويعفو عنها وعنا جميعًا».
