تحدث الفنان أحمد سعد خلال لقائه مع الإعلامية منى الشاذلي في برنامج «معكم» على قناة ON عن ذكريات طفولته وكيفية تحمله للمسؤولية منذ الصغر، قائلًا: «من زمان أمي علمتني أخلص المدرسة ولازم أشتغل، هي مش عايزة فلوس في البيت، بس لازم أبقى مسئول».
وأضاف أنه في فترة من حياته كان يساعد جيرانه مقابل أجر بسيط: «كنت أوصل طلبات للناس بمقابل بدأ بشلن، والدنيا لعبت في إيدي وبقيت كأني أبليكيشن للمنطقة، أي حد عايز حاجة يديني فلوس، وعقلي اشتغل في الاتجاه التجاري، واشتغلت في النقاشة وحاجات كتير».
وتابع: «لما صحابي كانوا يخرجوا ويلعبوا، أنا كنت بروح أشتغل علشان أثبت إني مش رايح لطريق وحش».
وكشف أن رغبته في إثبات نفسه وسط عائلته كانت الدافع وراء تنمية موهبته: «ده سر الموهبة، لما تعيش في بيت فيه 9 أفراد لازم يكون عندك حاجة تقدمها، وإلا هتتهرس. بدأت بقراءة القرآن والابتهالات، وبعدها غنيت لأم كلثوم وعبدالوهاب، علشان كل يوم جمعة لما العيلة تتجمع أقدر أظهر موهبتي. ولحد دلوقتي بحب نظرة الإعجاب في عيون أهلي وإخواتي، وسعيت كتير عشان أوريهم إني كويس».