اخترت أغنية عصفور بمسلسل لام شمسية وبكيت بسببها

أكدت الفنانة أمنية خليل أنها اختارت أغنية “عصفور” لعايدة الأيوبي، لتكون نهاية الحلقة السادسة من المسلسل “لام شمسية” الذى يعرض لها حاليا.

وأوضحت أمينة خليل في لقاء مع ET بالعربي: “الأغنية كانت اختياري لأن مامتي كانت بتغنيها لي وأنا صغيرة عشان مخافش، لما قريت الورق وكنت متكلمة مع كريم الشناوي على أغنية وفكرة أن يكون فيه الدفا الأمومي المبني بين “نيللي” والولاد ولما لقيت الأغنية اللي كانوا مختارينها أنا مكنتش أعرفها حسيت أن مش 100% هعرف أحس اللي المفروض أحسه في المشهد دا فطلبت أن ممكن تبقى الأغنية “عصفور” ووافق وغنيتها مع الأولاد، أنا بحب عايدة الأيوبي”.

وأوضحت أمينة خليل : خلصت الحلقة ولقيت نفسي قاعدة بعيط، وقلت إذا كان أنا اللي في المشهد أنا بعيط ليه أنا عارفة اللي هيحصل، بس هو كان مشهد مؤثر جدا فكرة مشهد العمارات قد إيه هو معبر وبيقول أن كل البيوت والشبابيك فيهم قصص وناس. 

مسلسل لام شمسية يضم عددا كبيرا من النجوم، من أبرزهم أمينة خليل، ياسمينا العبد، أحمد السعدني، يسرا اللوزي، محمد شاهين، أسيل عمران، صفاء الطوخي، ثراء جبيل، وغيرهم من الفنانين، وهو من تأليف مريم نعوم وإخراج كريم الشناوي، وتدور أحداثه في إطار تشويقي، ويتكون من 15 حلقة.

إشادة بمسلسل لام شمسية 

من ناحية أخرى أشاد الناقد أندور محسن بالحلقة الاولي من مسلسل “ لام شمسية” ، والذي يقوم ببطولته أحمد السعدني وأمينة خليل . 

قال اندرو محسن على صفحته علي موقع فيسبوك : عجبتني الحلقة الأولى من “لام شمسية” جدًا. حلقة متماسكة، وطبعًا الموضوع الأساسي مهم، بس اللي عجبني مش الموضوع في حد ذاته لكن كتابة الحلقة وتقديم الشخصيات عمومًا.

وتابع اندرو محسن : المسلسل فيه علاقات أسرية متشابكة وشخصيات كتير، بشكل مربك شويه في حلقة واحدة، لكن السيناريو بدل ما يستعين بالطريقة السهلة بتاعت “مساء الخير يا طليقتي يا اللي جبت منك طفل أنا بربيه حاليًا مع مراتي الجديدة”، خلانا نتعرف على الشخصيات شويه شويه من الأحداث، ثم كان فيه تتابع طويل لعيد ميلاد بيعرفنا على الشخصيات على لسان شخصيات تانيه، وبنشوف فيه خريطة الصراعات، أو جزء منها، مين بيحب مين ومين واخد موقف من مين.

واوضح : إخراجا فيه تون واضح من أول الحلقة لآخرها، بس اللي ممكن نقف عنده هو مشهد النهاية، من النادر جدًا في المسلسلات نشوف احترام لمفهوم الصمت وتأثيره للشعور باللحظة، قطعات متتالية متأنية على وشوش الشخصيات لرصد ردود فعلهم من الصدمة، اللي هو زود وقع المشهد كله على المُشاهِد ، أتمنى المسلسل يكمل بنفس المستوى.