وجه أحمد شوبير حارس مرمى الأهلي ومنتخب مصر السابق، رسالة قوية إلى أحمد فتوح بعد انتظامه في تدريبات الفريق الكروي الأول بنادي الزمالك أمس.
وقال أحمد شوبير: «إمبارح أحمد فتوح انتظم في تدريبات فريق الزمالك، وأتمنى من الله أن تكون هذه أخر غلطة ليك لإن الناس جابت أخرها معاك، أنا هكون قاسي عليك شوية عارف الغلطة الفنية لما تجيب جون في نفسك أو تغلط في أوفر أو تقلش، كل دي أخطاء عادي معندناش مشكلة فيها لكن الأخطاء السولكية غير مقبولة مينفعش».
وتابع أحمد شوبير: «ولازم يا فتوح تستفيد من الدرس ولكنك حتى الآن لم تستفد من أي درس حصل معاك ولا درس واحد، وبتاخد الأمور ببساطة».
وأوضح شوبير: «يعني أنت يا ابني اتعرضت لمحنة صعبة جدا وتسببت في وفاة أحد رجال الداخلية، اه دفعت الدية والناس قبلوا وحافظوا على مستقبلك لكن أنت كمان أقبل بقه وأنت من جواك اتصالح مع نفسك».
وأضاف شوبير: «أنا بقول لك كده عشان 3 حاجات، أولا ماعدش فيه وقت، ثانيا الناس مش هتسامحك تاني، ثالثا مهما كانت مهاراتك وإمكانياتك محدش هيجيبك تاني أي نادي هيقول لك أجيب واحد دائما عنده شغب ليه».