أعرب الفنان حمزة نمرة، عن سعادته بردود أفعال جمهوره مع ألبوم «قرار شخصي» منذ انطلاقته عبر المنصات الرقمية خلال الأيام الماضية، الذي يعد أحدث أعماله بصيف 2025.
وفي هذا السياق، وجه حمزة نمرة، عبر حسابه الرسمي بموقع تداول الصور والفيديوهات «إنستجرام» رسالة يكشف عن سعادته بنجاح الألبوم، قائلا: «زمان، لما كان حد يسألني في أي لقاء: هل حاسس إنك مش واخد حقك فنياً؟ كنت بقعد أفكر شوية وأبقى مش متأكد من الإجابة، وغالباً بكون أقرب لفكرة إني فعلاً كده».
كما أضاف نمرة: «لحد ما في يوم قعدت بيني وبين نفسي وسألت نفسي السؤال ده بجد، واكتشفت إن ربنا اداني أكتر مما أستحق، ووصلني لأبعد مما يفترض إني أوصل له بحسابات الدنيا وبالورقة والقلم، واحد ماشي عكس التيار، لا بيغني مواضيع شبه الرائج، ولا بيعمل موسيقى شبه الرائج، ولا بيلبس شبه الرائج، ولا بيفرض نفسه بالزنّ على الودان، وفوق ده كله انطوائي وما بيعرفش يخلق علاقات ومعارف في مجاله».
وتابع «نمرة»: «بالورقة والقلم وقوانين الطبيعة، المفروض يبقى بالكتير على هامش الفن ويبقى مسموع في دوائر ضيقة جداً، لكن إن اللي بقدمه ينتشر بالشكل ده، وإن ألبوماتي تنزل في موسم الصيف فتنافس فئات البوب وتبقى رائجة في كل المنصات، فده فضل من ربنا كبير أوي، ده مش حقي ده أكتر من حقي بمراحل. ف الحمد لله رب العالمين».
وأردف: «بشكركم إنكم كنتم سبب في النجاح ده، كل واحد سمعني واتأثر، اتكلم عني وسط صحابه، نشر أغنية ليا، حضر لي حفلة، ربنا جعلكم سبب في إن فني يفضل عايش، وسامحوني على أي تقصير أو حاجة كانت أقل من توقعاتكم، ده اللي ربنا يسره لي لتقديمه وربنا يرزقنا حسن النوايا، وأخيراً أشكركم من قلبي، ماشي على الله.. يتكعبل لو بص وراه».