شهدت محكمة الأسرة دعوى خلع، أقامتها سيدة أربعينية، ضد زوجها الأصغر منها بعشر سنوات، بعد زواج امتد عامين، مؤكدة أنها لم تعد تحتمل الاستمرار في حياتها الزوجية بسبب غياب التوافق بينهما.
وقالت الزوجة، في دعواها إنها تعرّفت على، زوجها 29 عامًا، خلال عملها بإحدى الشركات الخاصة، وانجذبت إلى شخصيته الحيوية، وحرصه على الاهتمام بها، رغم أنها تكبره بفارق زمني ملحوظ، وأوضحت أنها لم تلقِ بالًا لفارق العمر عند الزواج، معتبرة أن العمر مجرد رقم.
وتابعت الزوجة أمام المحكمة: «أنا في الأول قلت لنفسي إن فرق السن مش هيأثر، لكن الحقيقة اتضح غير كده، مع الأيام لقيت نفسي عايشة مع واحد بيفكر بطريقة مختلفة تمامًا، هو عايز سهر وخروج وكافيهات وسفر، وأنا خلاص شبعت من الحاجات دي، وبقيت محتاجة استقرار وبيت هادي، أنا كل همي ولادي من جوازي الأول، إزاي أوفرلهم مستقبل أحسن، تعليم كويس وأمان، لكن هو تفكيره كله منصب على إنه عايز يخلف فورًا، ومش فارق معاه إن الظروف مش مناسبة».
وأضافت: «حتى في تفاصيل حياتنا اليومية مفيش توافق، أنا بحب أقعد أقرأ كتاب أو أتابع فيلم هادي، لكن هو معظم وقته ماسك التليفون أو البلايستيشن، وكأننا عايشين في بيتين مش بيت واحد حسيت إن عمري ما هلاقي نفسي معاه».
وأكدت الزوجة أمام المحكمة: «أنا مش بقول إنه إنسان سيئ، هو شاب طيب، لكن مع الأيام حسيت إني مش مراته، أنا حاسّة إني والدته، كل خطوة محتاج مني نصيحة وتوجيه وتحمل تهوره، تعبت من الدور ده».
وأشارت إلى أنها حاولت مرارًا التفاهم معه لكن دون جدوى، مضيفة: «هو بيحبني ومتمسك بيا، لكن أنا مش قادرة أكمل الحب مش كفاية لازم يكون في توافق ودي غلطتي من الأول اني تغاضيت عن فرق السن».
وبعد فشلها في الحصول على الطلاق بالتراضي، لجأت الزوجة إلى محكمة الأسرة وأقامت دعوى خلع، معلنة استعدادها للتنازل عن جميع حقوقها الشرعية ورد مقدم الصداق مقابل الانفصال، وما زالت المحكمة تنظر الدعوى للفصل فيها خلال الجلسات المقبلة.