وجه أحمد شوبير حارس مرمى الأهلي ومنتخب مصر السابق، انتقادا لمسؤولي النادي بسبب وضع أحمد عبدالقادر لاعب وسط الفريق في ظل استبعاده من التدريبات الجماعية للفريق.
ونفى أحمد شوبير ما تردد في الساعات الماضية عن مشاركة أحمد عبدالقادر في المران الجماعي للأهلي، وقال: «ما تردد عن مشاركة لأول مرة غير صحيح محصلش لم يشارك حتى الآن في التدريب طب ليه ما أعرفش، هل من حقه يتدرب مع الفريق؟ اه طبعا، طيب اقول لك حاجة لو غاب يوم عن التدريب يتخصم له».
وتابع أحمد شوبير: «عبدالقادر ياعيني بيروح تدريب الأهلي بالغصبن وهو لاعب محترف وله عقد وبيقبض من الأهلي، ولكن لابد أن يتدرب مع الفريق الأول وأحمد عبدالقادر هيمشي من النادي الأهلي السنة اللي جاية ده مؤكد، والزمالك وبيراميدز بيفاوضوه وهو لاعيب جيد جدا، وعلى فكرة هو خاض تجربة ناجحة في قطر».
وأوضح حارس الأهلي السابق: «السؤال هنا.. لما الولد ده هيمشي هيطلع يكلم يقول أيه؟ ما هو انت مقعدني سنة مش بدرب مع الفريق طب ليه؟، غلط في مدرب غلط في مجلس الإدارة.. طلع في مؤتمر انتقد حد في النادي؟، الحقيقة مشفتش له حاجة زي كده، وبعدين لو طلع انتقد أو طلع عاتب أو طلع قال كلمتين هتزعلوا منه».
وأضاف شوبير: «هو بييجي يدخل الجيم وبيشتغل لوحده زي الموظف اللي بيمضي عشان ما يتاخدش غياب ولما لاعيب الكرة يتحول لموظف بتبقى كارثة، أنا عارف البعض بيزعل من كلامي ده بس لازم أكون أمين أنا مش عارف أيه المانع إنه يدرب معنديش فكرة حتى هذه اللحظة».