وجه الإعلامي أحمد شوبير، حارس مرمى الأهلي ومنتخب مصر السابق، انتقادات قوية لمسؤولي نادي بيراميدز، بعد طلبهم عدم إسناد أي مباراة للفريق في بطولة الدوري المصري للحكم أمين عمر.
وقال أحمد شوبير، في تصريحات إذاعية، اليوم الثلاثاء: «فيه اعتراض من بيراميدز ضد الحكم الدولي أمين عمر، على قراراته في مباراة الفريق أمام الإسماعيلي».
وكان أمين عمر قد أدار مباراة بيراميدز أمام الإسماعيلي، وقام بطرد مدرب الفريق السماوي يورتشيتش.
وأوضح أحمد شوبير: «الحقيقة الحاجات دي بدأت تضايقني، الأهلي اشتكى من محمد معروف، لكن لم يقل محمد معروف لا يحكم لي أي مباريات من تاني، ومش من حقك تطالب بعدم إسناد أي مباراة لفريقك لأمين عمر، لإن ده مش قرار النادي، ولما بيراميدز يطلب كده يبقى غلطان، ده قرار لجنة الحكام، يا إما يبقى خلاص بقه وكل واحد يختار الحكم اللي يحكم له».
وأضاف شوبير: «وبعدين اللي عمله يورتشيتش كان لازم يطرد عليه، والطرد كان سليما والعقوبات جات إيقافه وتغريمه سليمة، لإن مينفعش اللي حصل، إحنا ليه عاملين كده في نفسنا؟، لازم الأمور تمشي بشكل صحيح».