اعتذر مدير التسويق البرت جميل، لبعض النجوم الذين استخدم صورهم في مقطع فيديو مصنوع بتقنيات الذكاء الاصطناعي، مع المتوفين.
وكتب ألبرت جميل عبر صفحته الشخصية”فيسبوك”،عقب أعتراض الفنانة حنان مطاوع على تقديم المحتوى المؤثر دون الاستئذان،قائلا”انا بقدّم اعتذار رسمي لكل الأساتذة والفنانين الكبار اللي ظهروا في فيديو رسالة من عالم أخر، انا بحب اعمالك جدًا، وطريقتك المحترمة جدًا في الاعتراض تدرّس”.
وأضاف أعتذارة للنجمة ريهام عبد الغفور”انا آسف لحضرتك… شغلي في الـ Digital Marketing خلاني أعمل Hook في أول الفيديو، بس للأسف جه على حساب مشاعرك من غير قصد. كنت متخيل إن إظهار الفنان أشرف عبد الغفور وهو مبسوط وبيتواصل معاكي من الجنة إن شاء الله هيكون عزاء، بس طلع ده ممكن يضايق، وانا آسف، وأي نجم تاني ظهر في الفيديو وضايقه الموضوع، انا آسف جدًا”.
وأعرب عن تصرفه”انا غلطت إني ما استأذنتش من أي فنان أو من أهاليهم قبل ما أنزل الفيديو، بمنتهى الأمانة مكنتش متوقع خالص إن ده يكون رد الفعل، بالعكس كنت فاكر إن الكل هيبقى مبسوط إننا بنحيي ذكرى ناس كلنا بنحبهم. بس زي ما النجمة حنان مطاوع قالت: حتى لو النية كويسة، الفكرة ممكن تفتح أبواب لناس نيتهم مش كويسة يستغلوا الفنانين بشكل وحش”.
وأختتم حديثه”والحقيقة اللي شجعتني اعمل الفيديو هو إن الفترة اللي فاتت انتشرت صور كتير معمولة بالـ AI لفنانين بيتصوّروا وكأنهم بيحضنوا أحبابهم اللي توفوا، وشفنا فنانين نفسهم بيشيروا الصور دي ومبسوطين بيها. انا بس حاولت أطور الفكرة دي في شكل درامي متحرك برسالة هادفة ومؤثرة”.