دافع حازم إمام، نجم الزمالك ومنتخب مصر السابق، عن محمود حسن «تريزيجيه»، جناح الفريق الأول لكرة القدم بالنادي الأهلي ومنتخب مصر، بعد الانتقادات التي تعرض لها في الفترة الأخيرة.
وقال حازم إمام، في تصريحات عبر إذاعة «أون سبورت إف إم»: «أنا شايف حالة من الهجوم الشديد على تريزيجيه، بسبب مستواه، طبعًا هو مش في أحسن حالاته، ولكن لما يبقى في لعيب مستواه ثابت 8 سنوات ويحصل تراجع في مستواه 4 مباريات، بحس في ناس لما صدقت الفرصة عشان تخلص عليه».
وتسائل حازم إمام: «مش عارف ليه منفتكرش الحلو للعيبة، خصوصًا لو حد كويس، تريزيجيه عمره ما عمل مشكلة، منتخب مصر بقاله 8 سنين اللعيبة الأبرز فيه صلاح وتريزيجيه والناس كانت بتشوفه أحسن من صلاح، كل ده تحول إلى هجوم شديد كأن الراجل لازم يبطل!».
وتابع: «يا جماعة اللاعب ده بني آدم بيتضايق جدًا لما يتعرض للهجوم، إيه المشكلة لما يبقى وحش في فترة من الفترات لازم تقفوا معاه».
وواصل: «تريزيجيه، مع الأهلي أيضًا تعرض للهجوم بسبب ضربة الجزاء التي أضاعها في مباراة إنتر ميامي، براحة على اللاعب خاصة لما يكون أعطى لمصر الكثير».
وأتم: «إدوا للعيبة قيمتها وحسسوها بالأمان، متحسسوش اللاعب دايمًا إن أول ما يقع سكاكينه هتكتر».