يا ترى ليه العالم كله مركز دلوقتي على أدوات الدين المصرية؟ وإزاي ممكن ورقة مالية في مصر تكون أكتر استثمار مطلوب في الشرق الأوسط؟ وإيه اللي بيخلي المؤسسات الدولية والمحلية تضخ مليارات الدولارات في السندات وأذون الخزانة الفترة دي؟.. دي أسئلة بتدور في بال كل مستثمر الفترة الأخيرة، والسبب أدوات الدين المصرية.. وعلشان نفهم الموضوع ده بكل تفاصيله لازم نفهم القصة من كل جوانبها.
في سبتمبر اللي فات.. الفيدرالي الأمريكي بدأ تخفيض أسعار الفائدة وأول ما ده حصل المستثمرين الدوليين بدأوا يلفوا على أسواق ناشئة زي مصر عشان العائد عندنا ما زال مغري جدًا مقارنة بأسواق تانية.. في مصر العوائد على أدوات الدين المحلية ممكن توصل لـ 20%.. وده رقم مش موجود في أي حتة تانية بسهولة فليه تاخد فوايد أقل في أمريكا أو أوروبا طبيعي تجيب فلوسك على هنا.
نروح للبنك المركزي المصري والفايدة المحلية.. كل التوقعات بتقول إن البنك المركزي ممكن يبدأ يخفّض أسعار الفايدة قريب علشان التضخم بدأ يهدى شوية والاقتصاد محتاج دورة استثمار أقوى.. وده معناه إن السندات اللي هتشتريها النهارده بعائد عالي هتكون مكسب كبير جدًا لما الفايدة تقل.
كمان الثقة في الاقتصاد المصري بدأت ترجع.. ورغم كل التحديات اللي واجهتها مصر السنين اللي فاتت.. الاقتصاد بدأ يثبت إن عنده القدرة على الصمود.. الإصلاحات الاقتصادية الأخيرة والتعامل مع أزمة الدولار كلها خطوات بتطمن المستثمرين. وده اتأكد لما شفنا مؤسسات زي "صندوق النقد الدولي" بتشيد بالسياسات اللي بتاخدها الحكومة لتحسين الوضع.
رابع حاجة. . الطلب الزيادة على الأذون والسندات قصير الأجل.. أذون الخزانة خصوصًا اللي مدتها قصيرة بقت أكتر أداة مالية مطلوبة في السوق .. لأنها أقل مخاطرة.. وفي نفس الوقت بتقدم عوائد قوية.. المستثمرين بيشوفوا فيها حل سريع ومربح وده زوّد الإقبال عليها بشكل كبير.
وآخر حاجة هي ان انخفاض التضخم بيزود العوائد الحقيقية.. لما التضخم في مصر بدأ يقل .. العوائد الحقيقية على أدوات الدين بقت أكتر جاذبية. . بمعنى إن الفلوس اللي بتحطها دلوقتي بتكسبك عائد صافي أعلى وده اللي بيخلي المستثمرين يضخوا فلوس أكتر.
فلو بتدور على استثمار آمن ومربح.. أدوات الدين المصرية حالياً فرصة ذهبية.. العائد العالي مع استقرار السوق نسبيًا بيخليها واحدة من أفضل الأدوات الاستثمارية المتاحة دلوقتي.. بس لازم تتحرك بسرعة لأن القرارات دي بتتغير مع كل اجتماع للبنك المركزي أو الفيدرالي الأمريكي.. والدنيا كلها حاليا بتتكلم عن أدوات الدين المصرية وشايفة ان الاستثمار فيها من اعلى الحاجات المربحة فى العالم كله.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
