عاجل| السيسي: بحس أن المصريين قلقانين.. لكن أي تحدي بفضل الله هنقدر نتجاوزه

قال الرئيس عبد الفتاح السيسي خلال لقائه مع أعضاء هيئة التدريس بالأكاديمية العسكرية المصرية والطلبة المستجدين وأسرهم وعدد من دارسي الدورات المدنية، بمناسبة ذكرى العاشر من رمضان: “عاوز أشكركم أنه خلال عملية الانتقاء والاختيار ومش بنقول كلام أننا قاعدين مع بعض، اللي إحنا فيه أفضل اللي موجود من كل التخصصات ده الأفضل، وده معناه أن الأسر والأهالي قاموا بجهد كبير ورعاية كبيرة وأشكركم على هذا الأمر”.

وأضاف السيسي: “هقول كلمة واحدة مهمة أوي، بحس أن المصريين قلقانين وده أمر جيد، لأن الأحداث اللي جنب مننا تدعو للقلق، طالما الشعب المصري متماسك وعلى قلب رجل واحد أي تحدي بفضل الله هنقدر نتجاوزه، وزي ما انتوا شايفين العالم مش بس المنطقة بتدور فيها أحداث متسارعة ومتناقضة أحيانًا، الحفاظ على الدولة المصرية ومقدراتها شغلنا الشاغل”.

وتابع الرئيس: “تعاملنا مع كل القضايا والتحديات بحسابات دقيقة جدًا وبتريث وصبر كبير جدًا، عزائي الوحيد إن شعب مصر ودي مش مجاملة والله هو اللي مخلي الأمور رغم قساوتها وظروفها الصعبة نقدر نجابهها، بيكم أنتم المصريين وقبلنا الله سبحانه وتعالي اللي مطلع علينا وشايف بندير الأمور إزاي بنسعى للتهدئة وإيقاف إطلاق النار ومنع المنازعات وعمل كل ما يمكن لتهدئة وإيقاف الصراعات والاقتتال والحروب”.