يا ترى إيه علاقة حرب الرسوم الجمركية اللي أشعلها الرئيس الأمريكي دونالد ترامب، بسوق السيارات في مصر، هل لها تأثير كبير، يعني هترفع أسعار العربيات ولا هتساهم في تخفيضها خاصة مع تحول نسبة أكبر من المكون الصيني لأسواق تانية زي مصر، طب إيه اللي هيحصل في الأيام الجاية؟
بص يا سيدي، سوق السيارات في كل دول العالم مرتبط ببعضه، يعني لو الأسعار العالمية ارتفعت فكل بلد هتتأثر بيها وبالتالي هتحصل زيادات لها في السوق المحلي، وبالتالي هيحصل تغييرات في أسعار المعروض دلوقتي عند الشراء.
طب إيه هو بقى تأثير قرار الرسوم الجمركية اللي فرضها ترامب على الصين بسوق السيارات عندنا في مصر؟
دلوقتي، الحرب التجارية العالمية بين أمريكا وكندا والمكسيك والصين، وفرض الرسوم الجمركية بالتأكيد أثرت على أسعار السيارات في العالم كله، وفي كل دولة، وده لأن أي قيود أو رسوم إضافية على واردات مكونات الإنتاج هتنعكس على التكلفة النهائية للعربيات في السوق المحلية.
أما بقى سوق السيارات في مصر، اللي كان كان يعاني من الركود، فهو شهد انتعاشة قبل شهر رمضان بحوالي أسبوع، يعني زادت المبيعات مدعومة بالعروض اللي قدمها الوكلاء، وده بجانب توقعات بارتفاع الأسعار بعد العيد.
وكل ده دفع المستهلكين للإسراع في الشراء، خاصة وإن تحركات سعر الدولار ساهمت في تحفيز الطلب وزيادة حركة المبيعات خلال الفترة الأخيرة.
أما بقى بخصوص توقعات الأسعار، فنقدر نقول إن أي انخفاض أو زيادة في أسعار السيارات مرتبط بشكل مباشر بسعر الدولار في البنوك، بس الاتجاه المتوقع حاليا هو استمرار ارتفاع أسعار السيارت في الفترة الجاية وحتى نهاية سنة 2025، عشان كده، لو ناوي تشتري عربية ماتستناش كتير.
ولو ناوي تشتري عربية جديدة هنقولك شوية نصايح مهمة، واللي أولها إنك لازم تجمع معلومات عن العربية اللي انت ناوي تشتريها كويس، وياريت لو تاخد معاك حد فاهم في العربات عشان يتأكد من جودتها ويختبرها كويس، ولو عجبتك العربية وطلعت مناسبة ليك ماتنساش تعمل عقد رسمي بعملية البيع والشراء ويكون موثق في الجهات الحكومية وده عشان تضمن حقك.
كمان، ياريت تشتري من مكان معروف ومضمون وسمعته كويسة، وماتنساش توثق أوراق العربية أول بأول، عشان تضمن حقك وفلوسك في نفس الوقت، ومايتنصبش عليك، وتضمن حقك كويس، وحاول تستغل فترات العروض عشان تستفيد من الخصومات وتطلع كسبان.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
