عمرك تصورت قبل كده انك ممكن تفتح حساب بنكي في 5 دقايق وأنت قاعد في البيت؟ أو تدفع فواتيرك وتحوّل فلوس وتاخد قرض وكل ده بضغطة زرار من على موبايلك؟.. السؤال الأهم إزاي البنك المركزي نجح فى تحقيق حلم التحول الرقمي؟ وايه الفوايد اللى بتعود على المواطن وعلى اقتصاد البلد من تسهيل عمليات التحويل النقد والمدفوعات الاليكترونية؟
التحول الرقمي مش بس غيّر شكل الخدمات البنكية لكنه كمان بيغير حياتنا اليومية بالكامل. ووراه قوة كبيرة بتقود التحول ده هي البنك المركزي المصري.
وخليني أقول الأول .. يعني إيه التحول الرقمي في البنوك؟
التحول الرقمي ببساطة هو لما البنك اللي كان بيحتاج منك تمشي في طوابير وتروح أفرع وتمضي ورق كتير يتحوّل لبنك موجود على موبايلك أو الكمبيوتر.. بقيت تقدر تفتح حساب و تحوّل فلوس و تتابع استثماراتك، وكل ده من أي مكان وفي أي وقت.. والهدف هو تسهيل حياتك… وتوفير وقتك.. وكمان مواكبة التطور التكنولوجي فى العالم.
طب ده حصل إزاي؟
البنك المركزي المصري لعب دور البطل في القصة دي.. خلال السنين الأخيرة المركزي قدم مبادرات وتشريعات ساعدت في بناء نظام مالي رقمي قوي… البنك المركزي اشتغل على قوانين جديدة زي قانون خدمات الدفع الإلكتروني اللي نظم كل حاجة متعلقة بالدفع الرقمي وحماها.
كمان المركزي دعم المحافظ الإلكترونية.. عارف إن النهارده عندنا أكتر من 30 مليون محفظة إلكترونية في مصر؟ وكلها بتشتغل تحت إشراف البنك المركزي.. و تقدر من خلالها تدفع فواتيرك وتحوّل فلوس لأي حد أو حتى تشحن رصيد موبايلك.
ومصر بتتحول تدريجيًا لمجتمع بيستخدم المدفوعات الإلكترونية أكتر من الكاش.. النهارده تقدر تدفع في السوبر ماركت ومحطات البنزين وحتى التاكسي عن طريق الموبايل أو كروت الدفع الذكية.
والجديد إن البنك المركزي مش بس بيركّز على المدفوعات لكنه بيمهّد الطريق لحلول أكثر تقدما.. زي "التمويل الرقمي".. دلوقتي تقدر تقدم على قرض من موبايلك وتستلم الموافقة أو الرفض خلال دقائق.
كمان المكرزي بيدعك البنوك الرقمية .. دي بنوك ملهاش فروع خالص كل حاجة فيها بتتم أونلاين ومن المتوقع نشوف أول بنك رقمي مصري قريب جدا.
حد ممكن يسأل إيه أهمية التحول الرقمي ده ليا كمواطن؟
ليه أهمية كبيرة طبعا .. أولها توفير وقت ومجهود بدل ما تروح فرع البنك وتقف في طوابير كل حاجة دلوقتي بتتم أونلاين.. وتانيها خفض التكاليف.. المعاملات الرقمية أرخص من الورقية..ويرضو بتحقق الشمول المالي .. لأن أكتر من 60% من المصريين مكنش عندهم حسابات بنكية.. النهارده الوضع بيتغير بسبب الأدوات الرقمية زي المحافظ والبنوك الإلكترونية .. واللي يطمن أكتر البنك المركزي بيشرف على كل العمليات الرقمية علشان يضمن إنها محمية 100%.
ومصر بتتحرك بسرعة رهيبة في مجال التحول الرقمي.. وده بفضل رؤية البنك المركزي وجهود البنوك والشركات المالية التكنولوجية.. لكن نجاح القصة دي معتمد على حاجة واحدة وعي الناس يأهمية التحول الرقمي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
