هل الاقتصاد المصري فعلاً في طريقه للتعافي؟ وليه رغم تخفيض صندوق النقد لتوقعاته لنمو اقتصاد مصر لسه بيراهن على قدرته على عبور المرحلة الصعبة؟ وليه أصلا التوقعات عن النمو تراجعت؟
في آخر تقرير صادر عن صندوق النقد الدولي.. توقعات النمو للاقتصاد المصري لعامي 2025 و2026 اتخفضت.. وآه التوقعات مش زي ما كانت بس الصندوق بيقول إن التعافي لسه ممكن ومستمر.
طب إيه اللي حصل؟ وليه الأرقام نزلت؟ وإزاي لسه عندهم تفاؤل؟
الصندوق قال إن نمو الاقتصاد المصري في 2025 هيكون حوالي 3.6%، وفي 2026 هيزيد شوية لـ4.1%.. الأرقام دي أقل من التوقعات اللي كانت في أكتوبر اللي فات.. يعني بنشوف انخفاض بنسبة 0.5% لعام 2025 و1% لعام 2026..و السبب هو ضعف الثقة في السوق مع وجود شح في العملات الأجنبية.
طب هل ده معناه إن الاقتصاد المصري في ورطة؟
الحقيقة ان كتير من الخبراء بيقولوا ان رغم التحديات دي الصندوق شايف إن فيه فرص حقيقية للتعافي على المدى المتوسط… وده معناه إن الاقتصاد مش واقف لكنه محتاج وقت وصبر.
وإزاي ممكن يحصل التعافي ده؟
الصندوق ركز على نقطتين مهمين تحسين أوضاع سوق النقد الأجنبي وزيادة ثقة المستثمرين.
ولو النقاط دي اتطورت هيبقى فيه تحفيز كبير للنشاط في القطاعات الرئيسية.. زي التعدين والصناعات التحويلية.. القطاعات دي لو اشتغلت بكامل طاقتها هتكون واحدة من المفاتيح الرئيسية للتعافي الاقتصادي في مصر.
طب ليه الثقة ضعفت؟
السوق بيعاني شوية من الضبابية بسبب مشاكل العملة الأجنبية.. لما يبقى فيه قيود على توفر العملات بيحصل تباطؤ في الاستثمارات وده بيأثر على النمو بس لو الحكومة قدرت تتعامل مع النقطة دي وتحسن من أوضاع السوق التعافي هيبقى أسرع.
وهل في أمل فعلاً ؟
صندوق النقد بيقول إن فيه إشارات إيجابية.. التوقعات يمكن أقل شوية لكنهم لسه شايفين إن الاقتصاد المصري قادر يرجع للوقوف على رجليه.. من خلال تحسين السياسات الاقتصادية ودعم الاستثمار والتعامل مع شح العملات الأجنبية ودول هيجددوا بشكل كبير سرعة التعافي ده.
إيه المطلوب دلوقتي؟
المطلوب نشتغل على جذب استثمارات أجنبية جديدة والحكومة تقدر تحل مشاكل العملات الأجنبية علشان تسهيل حركة السوق.. والتركيز على القطاعات الواعدة زي التعدين والصناعات التحويلية.
و رغم تخفيض توقعات النمو الاقتصاد المصري لسه عنده فرصة إنه يرجع أقوى..و الأهم دلوقتي هو إن الحكومة والمؤسسات تستغل الفرصة دي وتشتغل على تحسين الثقة في السوق علشان نقدر نعدي المرحلة الصعبة دي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
