إزاي قناة السويس هتفصل شريان الحياة الرئيسي للتجارة الدولية والنقل البحري في العالم وإزاي الأسواق وشركات الشحن البحري في انتظار عودتها لطبيعتها والعالم خسر قد ايه لما اتأثرت بالأحداث.
مع دخول هندنة غزة يومها الأول ساد التفاؤل الشديد بين الشركات العالمية المتخصصة في النقل البحري واللي تكبدت خساير اقتصادية ضخمة بعد اضطرارها للمرور عبر مسارات تانية بعيدا عن قناة السويس في ذروة الصراع في المنطقة وتعرض أمن السفن للخطر في جنوب البحر الأحمر.
صحيفة "لويدز ليست" ودي أقدم صحيفة بريطانية متخصصة في بيانات صناعة الشحن العالمية طلعت تقرير بمناسبة التطورات الأخيرة في الشرق الأوسط وأهمية الممر الملاحي لقناة السويس وقالت إن شركات التأمين البحرية في لندن تحملت خسائر فادحة السنة اللي فاتت بسبب تأثر الملاحة في قناة السويس المصرية.
التقرير البريطاني كشف كمان إن الخسائر الاقتصادية الأوسع على كانت على الاقتصاد العالمي ودا نتيجة قرار معظم مالكي السفن بإعادة توجيه مساراتهم من قناة السويس إلى رأس الرجاء الصالح، وكشف إن الخسائر بمليارات الدولارات وإن حوالي 12,305 سفينة اختارت القيام برحلة أطول عبر رأس الرجاء الصالح.
بورصة لندن قدرت التكلفة الإضافية للرحلة بعيدا عن قناة السويس بسبب زيادة استهلاك الوقود والصيانة، بحوالي 932.905 ألف دولار لكل رحلة، ودا قبل خصم الرسوم التي بتحصلها قناة السويس واللي مدفعتهاش السفن وبحسبة بسيطة العالم خسر 11.5 مليار دولار ولو كانت السفن دي عدت في قناة السويس ودفعت الرسوم كانت هتوفر حوالي 4.5 مليار دولار ودا غير قصر المسافة وسرعة وصول الشحنات وقلة المخاطر ودي شهادة دولية بأهمية قناة السويس المصرية.
لويدز ليست توقعت أفضل السيناريوهات لما قالت إن معظم السفن العالمية في النهاية هتستأنف عبورها عبر قناة السويس، لكن الموضوع هياخد وقت من شهر ل3 شهور لو استمر استقرار الأوضاع وانتهي الصراع في المنطقة.
ومش بس كده الصحيفة البريطانية قالت حاجة غريبة جدا وهي إنه مع عودة حركة الملاحة الكاملة لقناة السويس الأسواق الدولية هيحصل فيها إعادة جدولة وتخطيط لانه هتحصل حالة من ازدحام المواني واضطرابًا في سلسلة التوريد.
خلاصة التقرير إن قناة السويس مفيش عنها بديل عالمي وكل اللي روجته منصات الشر وأعلامها الخبيث ملهوش أي أساس من الصحة والتجربة أكدت بعد نظر الرئيس السيسي في تطوير قناة السويس ومشروع القناة الجديدة لاستيعاب كل أنواع السفن ومش بس كده دا حول المناطق اللي حوليها لقلاع صناعية عالمية ولما المشروعات اللي فيها تخلص منطقة قناة السويس هتغير موزاين التجارة مش في مصر بس لكن في المنطقة كلها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
