ايه اللي بتعمله مصر في افريقيا وليه مصر رفعت العلاقات مع نيجيريا لمستوى الشراكة الشاملة واشمعنا نيجيريا وايه سر التوقيت.
مصر هي بوابة أفريقيا وأفريقيا قارة مليانة ثروات طبيعية وكنوز اقتصادية وإمكانيات ملهاش حدود لكن طول عمرها بينقصها التخطيط الصح والاستفادة الحقيقية من مواردها وطول عمر مصر بتمد ايديها لاشقاءها في القارة الأفريقية لكن اللي حصل على مدار السنتين تلاتة اللي فاتوا كان مختلف جدا وهي إن مصر حولت التعاون الي استثمار في افريقيا والشركات المصرية في عهد الرئيس السيسي انطلقت في دول القارة الأفريقية ونفذت ولسه بتنفذ مشروعات ضخمة في دول كتير وحسمت المنافسة مع شركات عالميه كمان وقدرت مثلا الشركات المصرية تنفذ أهم سد في تنزانيا وسد تاني في بوروندي ومشروعات استاد اكي بو المجمع الأوليمبي باوغندا وغير الصروح العلمية والجامعات ومقار الوزارت في مختلف دول القارة.
اخر صور التعاون والتوسع الاقتصادي المصري في افريقيا كان في ترفيع العلاقات المصرية مع نيجيريا إلى مستوى الشراكة الشاملة ودا مصطلح معناه إن الدولتين داخلين في مرحلة تانية ومختلفة في كل المجالات وخاصة الاقتصادية والتجارية والمالية وتسهيل الاستثمار المتبادل والاستفادة من الإمكانيات بين البلدين والحقيقة مصر تقدر تقول بقت وكيل حصري للشركات والاقتصاديات الأفريقية بفضل البنية التحتية المتطورة والضخمة اللي نفذتها مصر في آخر 10 سنين في كل القطاعات من طرق وموانئ ولوحستيات وشبكات نقل وسكك حديد ومطارات واتصالات وكهربا وشبكات تكنولوجية خلتها تستوعب أي تعاون تجاري وتستقبل وتصدر اي حجم من المنتجات والبضائع من والى أفريقيا والعالم.
ودا اللي حصل فعلا وهي إن نيجيريا قررت الاستفادة من موقع مصر الجغرافي المميز وإمكانيات البنية الأساسية عندها في ترويج منتجاتها للأسواق الخارجية والعكس صحيح تكون مصر البوابة الرئيسية لدخول المنتجات الخارجية للأسواق النيجيرية وعلى فكرة نيجيريا أكبر دولة في افريقيا من حيث عدد السكان واللي بيوصل 223 مليون نسمة والعلاقات المصرية النيجيرية قوية جدا وبترجع لحوالي 60 سنة.
وعشان كده البلدين قرروا الاستفادة اكتر من الإمكانيات المتاحة وتوثيق التعاون في مجالات كتير ودا اللي تتناقش في فعاليات منتدى الأعمال المصري النيجيري المشترك واللى عقد تحت عنوان" الشراكة المصرية النيجيرية: إطلاق آفاق الازدهار المشترك عبر التجارة والاستثمار".
المهندس حسن الخطيب وزير الاستثمار والتجارة الخارجية قال إن مصر ونيجيريا هما أكبر دولتين في القارة الإفريقية، وأن تعاونهم هيشكل حجر الزاوية لتعزيز التنمية الاقتصادية والتجارية في القارة وهيمهد الطريق لتحقيق نمو في مجالي التجارة والاستثمار على مستوى القارة الإفريقية.
وحسب الوزير الاقتصاد المصري أصبح جاهز لقيادة القطاع الخاص لعملية التنمية الاقتصادية وتعزيز التجارة والاستثمارات بفضل البنية التحتية التقليدية والرقمية ودعا المستثمرين النيجيريين للاستفادة من البنية التحتية المتطورة فى مصر والاتفاقيات التجارية اللي بتتيح الوصول إلى أسواق تضم أكتر من 70 دولة بما فيها الاتحاد الأوروبي، والدول العربية، والكوميسا، والميركوسور.
أبو بكر كياري وزير الزراعة والأمن الغذائي النيجيري قال إن نيجيريا بتسعى للاستفادة من الخبرات المصرية والتقنيات المتقدمة والمنخفضة التكلفة في مجالات الزراعة والري، وانغ مصر بتتمتع بمكانة إقليمية كمركز تجاري وشبكة قوية هتمكنها من تسهيل تصدير المنتجات الزراعية النيجيرية إلى الأسواق العالمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
