إيه اللي حصل عشان صادرات الدهب المصري تحقق طفرة غير مسبوقة؟ إزاي الأرقام قفزت بالشكل ده؟ وإيه الحكاية ورا الإمارات وسويسرا وهوسهم بالدهب المصري؟ وهل ممكن نشوف مصر بين الكبار في تصدير الدهب قريب؟
الأرقام اللي بنشوفها دلوقتي أرقام ضخمة جدًا.. صادرات مصر من الدهب والأحجار الكريمة حققت قفزة بنسبة 74% في أول 11 شهر بس من 2024.. وسجلت 2.85 مليار دولار، مقارنة بـ1.64 مليار دولار في نفس الفترة السنة اللي فاتت.. يعني تقريبًا ضِعف الرقم.
الإمارات وسويسرا لوحدهم استحوذوا على أكتر من 96% من صادرات الدهب المصري في الفترة دي.. الإمارات لوحدها رفعت وارداتها من الدهب المصري بنسبة 103%، وسجلت 1.76 مليار دولار بعد ما كانت 874 مليون دولار بس في 2023. . وسويسرا ما كانتش أقل لأن وارداتها زادت بنسبة 193% وسجلت مليار دولار مقارنة بـ364 مليون دولار السنة اللي فاتت.
بس مش كله نمو وزيادة.. في دول تانية حصل فيها تراجع زي كندا اللي وارداتها من الدهب المصري انخفضت بنسبة ضخمة جدًا، وصلت لـ98% بسجل 6 مليون دولار بدل 373 مليون دولار في 2023.. تركيا كمان قللت وارداتها بنسبة 89% وسجلت 2.5 مليون دولار بس.
وفي المقابل الأردن حققت طفرة ضخمة في وارداتها ودي كانت مفاجأة كبيرة.. صادرات مصر للأردن زادت بنسبة أكتر من 2000%، وسجلت 3.3 مليون دولار بعد ما كانت مجرد 0.1 مليون دولار السنة اللي فاتت.
السؤال هنا.. إيه السر ورا القفزة الكبيرة دي؟
مصادر كتير أكدت إن اللي حصل ده سببه ارتفاع الأسعار العالمية للدهب خلال 2024 بجانب إن مصر زودت كميات التصدير بالتزامن مع زيادة الإنتاج في المناجم المحلية.. بالإضافة لكده وجود بورصات عالمية لتداول السبائك في الإمارات وسويسرا خلّى الدولتين وجهة رئيسية للدهب المصري بحسب رئيس الشعبة العامة للمشغولات الذهبية هاني ميلاد.
وفيه توقعات قوية إن القفزة دي مش هتتوقف هنا.. المصادر بتقول إن صادرات مصر من الدهب ممكن تكسر حاجز الـ3 مليار دولار بنهاية 2024 مع استمرار النمو في 2025.. وده بيخلينا نسأل: هل ممكن مصر تدخل قائمة أكبر 20 دولة مصدرة للذهب في العالم زي ما بتخطط الحكومة؟
الإجابة متعلقة بإن الحكومة مش بس عايزة تصدّر أكتر لكنها كمان بتسعى لتطوير قطاع التعدين بشكل عام بحيث يوصل الدهب المصري لأسواق أكتر وأكبر.. وده لو حصل ممكن نشوف مصر في قائمة الدول العشرة الأوائل في تصدير الدهب بحلول 2027 زي ما صرّح إيهاب واصف، رئيس شعبة الذهب والمجوهرات باتحاد الصناعات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
