إيه اللي بيحصل في ملف الصناعة الوطنية وازاي شعار صنع في مصر هيرجع ينور تاني الأسواق المحلية والعالمية والأرقام بتقول ايه ومصر عندها كام مصنع دلوقتي وكامل الوزير ناوي يوصل لغاية فين بالصناعة المصرية.
الصناعة زي ما قلنا قبل كده كتير انها عصب اي اقتصاد لأنها بتوفر المنتجات للأسواق المحلية ويتصدر الزيادة للخارج واللي بتوفر مليارات الدولارات للدولة وكل ما الصناعة اتوسعت كل ما الدولة كانت قوة اقتصادية وكل عملتها ماكانت قوية وتقدر تواجه العملات التانية بجانب زيادة قوتها الشرائية ومشكلة مصر من السبعينيات هي ارتفاع فاتوره الاستيراد والاعتماد على المنتج الأجنبي أو عقدة الخواجة زي ما بنقول على حساب المنتج المصري ودا خلى الصناعة المصرية تتراجع ومصانع كتير قفلت وتانية اتجمدت مكانها من غير تحديث أو تطوير وتوسع.
لكن مع وصول الرئيس السيسي للحكم الفكر دا اتغير تماما والصناعة المصرية بقت أولوية في جدول كل الحكومات اللي جت في مصر من بعد 2014 وسمعنا عن برنامج تحديث الصناعة وانشاء مناطق صناعية ضخمة ومتعددة ومنتشرة جغرافيا والدولة استثمرت اكتر من 10 مليار جنيه في بناء 17 مجمع صناعي بـ 15 محافظة على مستوى الجمهورية وكمان نجحت مصر في تحقيق قفزة نوعية في عدد المصانع ومجال قطاع التصنيع، و احتلت المرتبة 30 عالميا، متفوقة على دول ذات تاريخ صناعي عريق زي النمسا والسويد وبلجيكا ودا إنجاز بيعكس جهود الدولة في تعزيز قطاعها الصناعي وزيادة الإنتاجية.
وبحسب الأرقام بلغت القيمة السنوية للتصنيع في مصر نحو 76,139 مليار دولار، مع حصة تصل إلى 0.48% من التصنيع العالمي، ودا بيمثل خطوة مهمة نحو تحقيق أهداف التنمية المستدامة وخلق فرص عمل واسعة.
وحسب الإحصاءات الرسمية المتاحة وصل عدد المصانع العاملة في مصر إلى 56.500 ألف مصنع لغاية 2023 وفق مركز المعلومات واتخاذ القرار مقارنة بعدد 34.383 ألف مصنع في عام 2016 وفق هيئة التنمية الصناعية، وتتوزع المصانع على قطاعات متنوعة تشمل الصناعات الغذائية والنسيجية والكيماوية والمعدنية والهندسية ويستوعب القطاع الصناعي اكتر من 3.5 مليون عامل، مما يؤكد دوره المحوري في توفير فرص العمل ودفع عجلة التنمية الاقتصادية.
ورغم الأرقام الإيجابية للمصانع العاملة لكن القطاع الصناعي بيواجه تحدي كبير بيتمثل في تعثر عدد ملحوظ من المنشآت الصناعية وحسب الإحصاءات فيه 5,800 منشأة صناعية متعثرة و5,500 مشروع صناعي متعثر تحت الإنشاء بإجمالي يتراوح بين 11,500 و12,000 مصنع متعثر والملف دا اللي شغال عليه الفريق كامل الوزير وزير الصناعة مع الإعلان عن خطوات لإنهاء أزمات المصانع المتوقفة ومع دخولها الخدمة هتضيف قيمة ضخمة جدا للقطاع الصناعي.
طيب كامل الوزير ناوي على إيه في ملف الصناعة ؟
شوف حضرتك الحكومة بقت تخطط لكل الملفات على فترات زمنية يعني مثلا في المجال الصناعي الحكومة بتستهدف في رؤية مصر 2030 رفع مساهمة القطاع الصناعي في الناتج المحلي بشكل كبير والوصول إلى 20% في السنة الحالية 2025 بدلا من 17% في الوقت الحالي وتحقيق نسبة 25% بحلول عام 2030 وادا هيزيد من فرص التصدير والوصول في نفس الوقت لرقم 100 مليار دولار صادرات بجانب تعزيز المنتج المحلي في الأسواق المصرية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
