إزاي الجنيه المصري صمد قدام الدولار؟ هل هي خطوة عبقرية من الحكومة؟ ولا مجرد هدنة قبل ما الدولار يرجع يرتفع تاني؟ وهل فعلًا الجنيه بقى أقوى ولا ده مجرد استقرار مؤقت؟
هنحاول نفهم إيه اللي بيحصل في سوق الصرف.. وإزاي مصر قدرت تحافظ على استقرار الجنيه رغم التحديات الاقتصادية العالمية.
وخولنا نبدأ من المشهد الحالي في سوق الصرف.. بعد فترة طويلة من التذبذب، الدولار أخيرًا بدأ يستقر مقابل الجنيه ولكن مش بنفس معدلات الارتفاع اللي كان عليها قبل كده في البنك المركزي المصري الدولار بيسجل 50.16 جنيه للشراء، و50.30 جنيه للبيع.. وفي البنوك التجارية زي الأهلي ومصر والقاهرة السعر ثابت عند 50.18 للشراء و50.28 للبيع.
أما في البنوك الخاصة زي التجاري الدولي وكريدي أجريكولالسعر عند 50.19 للشراء و50.29 للبيع.
لكن ليه الدولار مبيتحركش بقوة زي الأول؟ وإزاي الجنيه صامد قدامه؟
فيه 5 أسباب رئيسية وراء صمود الجنيه المصري و سر استقراره قدام الدولار.
أولهم توحيد سعر الصرف.. في مارس اللي فات، الحكومة والبنك المركزي المصري خدوا قرار بتحرير سعر الصرف بالكامل، وده ساعد على تقليل الفجوة بين السعر الرسمي والسوق السوداء، وخلّى الطلب على الدولار يقل شوية.
كمان زيادة التدفقات الدولارية.. الاستثمارات الأجنبية المباشرة زادت بسبب صفقات جديدة ودخول صناديق استثمارية للسوق المصري، وده عزز الاحتياطي النقدي الأجنبي.
كمان برضو السياحة بتحقق أرقام قياسية.. رغم الأزمة في البحر الأحمر، إلا إن إيرادات السياحة وصلت لـ6.6 مليار دولار في النصف الأول من السنة، مع وصول 7 مليون سائح، وده دعم موارد الدولة من الدولار.
بالاضافة الى وجود دعم دولي وإقليمي قوي.. مصر قدرت تحصل على تمويلات متعددة الأطراف، وصندوق النقد الدولي وافق على المراجعة الرابعة لبرنامج الإصلاح الاقتصادي، وده بيدّي المستثمرين ثقة إن الاقتصاد المصري على الطريق الصحيح.
وخد عندك كمان.. تحويلات المصريين في الخارج.. اللى لسة بتعتبر مصدر مهم للدولار، ورغم التراجع البسيط، إلا إنها بتلعب دور كبير في دعم الجنيه المصري.
طب مستقبل الجنيه المصري رايح على فين.. وهل يستمر في الصمود؟
بنك مورجان ستانلي بيتوقع إن الجنيه هيفضل مستقر بين 48 – 52 جنيه للدولار في باقي 2025 بشرط استمرار الدعم الدولي واستقرار الوضع الاقتصادي.. لكن في نفس الوقت فيه توقعات إنه ممكن يوصل لأكتر من كده شوية لو زادت الضغوط على الاقتصاد المصري أو حصلت أزمة جديدة في المنطقة تؤثر على تدفقات الدولار.
الخلاصة الجنيه مش ضعيف لكنه تحت الاختبار القرارات الاقتصادية الأخيرة خلت الجنيه أقوى، لكن هل هيكمل بنفس القوة؟ ده اللي هنشوفه في الشهور الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
