السياحة عمود من اعمدة الاقتصاد القومي المصري.. ومصر بالتعاون مع تركيا حطوا خطة لسحب السياحة العالمية علشان تدخل مصر، واعداد السائحين اللي جايين مصر يتضاعفوا.. ياتري اية هيا الخطة دي .. واية الفايدة اللي هترجع علي مصر منها.
السياحة واحدة من الملفات المهمة اللي الدولة كلها بتشتغل علشان تحفزها، والدولة عندها خطة أنها توصل بعدد السائحين اللي جايين مصر لـ30 مليون سائح وتحقيق 30 مليار كايرادات من القطاع في 2030 وعلشان نوصل للرقم ده، لازم الدولة تعمل شوية تحفيزات كبيرة علشان توصل لهدفها.
الدولة المصرية علي مدار الفترة اللي فاتت عملت تحفيزات كبيرة لقطاع السياحة علشان نوصل لتحقيق 30 مليون سائح والتحفيزات دي عبارة عن حملات تريجية بتنفذها وزارة السياحة في الاسواق المستهدفة وخصوصا الاسواق اللي لها عدد سائحين كتير عندنا في مصر زي السوق الالماني والسوق الروسي والسوق السعودي والسوق الانجليزي والسوق الاوكراني، والدول دي هما اوائل الدول اللي لها عدد كبير من السائحين عندنا في السوق المصري.
تاني حاجة الدولة بتعملها علشان تحفز حركة السياحة الوافدة لمصر، هيا الافتتاحات الاثرية الجديدة، وسنة 2025 هتكون سنة فارقة في تاريخ السياحة الثقافية في مصر خصوصا انه هيكون فيها عدد كبير من الافتتاحات الأثرية أهمهم طبعا المتحف المصري الكبير واللي هيتم افتتاحها رسميا بكامل طاقته التشغيلية في 3 يوليو اللي جاي واللي هيقدم سيناريو عرض من موجود في العالم كله، وكمان هيعرض قطع أثرية أول مرة تظهر في التاريخ زي الموجودة الأثرية الكاملة للملك توت عنخ أمون واللي هتضم اكثر من 5300 قطعة آثرية أول مرة هتعرض بشكل كامل مع بعضها من وقت اكتشافها في الدير البحري في الاقصر في 1922، ده غير كمان الافتتاح المرتقب لمتحف عواصم مصر في العاصمة الإدارية الجديدة واللي هيحكي قصىة عواصم مصر من وقت بداية الاسرات لحد الدولة الحديثة واللي هيقدم برضوا تجربة سياحية آثرة فريدة هتتقدم لأول مرة في العالم.
طيب اية حكاية التعاون بين مصر وتركيا لزيادة حركة السياحة الوافدة لمصر؟.
تركيا هيا الدولة الوحيدة في العالم اللي عندها اكبر عدد من منظمي الرحلات، وهيا الدولة الأولي اللي مسيطرة علي سوق السياحة في روسيا، وحاليا في وفد كبير من وزارة السياحة والأثار في تركيا، علشان يدروسوا خطط زيادة الأقبال السياحي علي مصر، خصوصا ان منظمين الرحلات الأتراك والخطوط التركية هما اللي مسيطرين علي اغلب الحركة السياحية في العالم.
وزير السياحة والأثار عمل اكثر من اجتماع مع مسئولي شركات السياحة التركية وشركات الطيران علشان يشوفوا اية الأدوات والطرق اللي يقدروا من خلالها يزودوا عدد السائحين اللي جايين مصر، وقريب قوي هنسمع ان مصر كسرت الارقام القياسية في منطقة الشرق الاوسط في عدد السائحين الوافدين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
