يا ترى ايه حكاية المشروع الكبير اللي هتنفذه الكويت فى مصر؟ وايه علاقة شركة ميتسوبيشي اليابانية بالموضوع ؟ وازاى المشروع ده ممكن يغير شكل صناعة العربيات في مصر؟ وايه وإيه الحوافز اللي بتقدمها الحكومة المصرية عشان توطن الصناعة دي؟
من كام يوم، جه وفد من مجموعة الملا الكويتية واتقابل مع وزير الاستثمار والتجارة الخارجية حسن الخطيب.. اللقاء كان مليان تفاؤل وطموح.. والشركة الكويتية اللي معروفة بنشاطها واستثماراتها الكبيرة.. شايفة إن مصر بقت من أهم المقاصد الاستثمارية في المنطقة.. وفي نفس الوقت الحكومة المصرية مش سايبة حاجة للصدفة وعاملة شغل كبير لتسهيل الاستثمار في صناعة العربيات وغيرها من القطاعات الحيوية.
طب ليه الشركة الكويتية عايزة تتفاوض مع "ميتسوبيشي"؟
أول حاجة.. الشركة شايفة في السوق المصري فرصة كبيرة للتوسع والتواجد في بلد بيشهد نمو اقتصادي سريع.. و التفاوض مع شركة "ميتسوبيشي" العالمية للتصنيع بيتيح للملا فرصة إنهم يكونوا وكلاء رسميين للعربيات اللي بتنتجها الشركة اليابانية .. وده معناه نقل التكنولوجيا والمعرفة المتطورة لبلدنا.. والشركة دي مش بس هتصنع عربيات للمستهلكين المحليين لكن كمان هتفتح أبواب للتصدير للأسواق الخارجية. .يعني مش بس هنعزز الصناعة المحلية لكن كمان هنكبر من مكانتنا في السوق العالمي.. وهندخل دولارات للبلد.
وطبعًا الحكومة المصرية ماشية بخطى ثابتة لجذب الاستثمارات الأجنبية.. وخاصة في صناعة العربيات.. وزير الاستثمار قال إن فيه مفاوضات مهمة بتخص التوسع الاستثماري في مصر في مجالات أكتر من مجرد صناعة العربيات.. زي التعليم والخدمات المالية.. لكن الأهم هو اهتمام الدولة بقطاع صناعة العربيات اللي بقى يعتبر قطاع استراتيجي مش بس لتلبية احتياجات السوق المحلي لكن كمان للتصدير للأسواق الخارجية.
وعلشان نخلي الكلام على أرض الواقع.. الحكومة المصرية قدمت حزمة من الحوافز اللي بتسهل على المستثمرين دخول السوق المصري.. من ضمن الحوافز دي.. وزرة الاستثمار أعلنت عن 20 إجراء لتسهيل الأمور على الممولين ومجتمع الأعمال.. وده معناه تخفيف الأعباء الضريبية وتشجيع الشركات على استثمار أكتر في مصر.
الحكومة شغالة كمان على تقليل عدد الجهات الحكومية اللي بتتعامل مع المشروعات الاستثمارية.. وده بيخلي كل الإجراءات أسهل وأسرع.. والحكومة مستهدفة تقليل الزمن ده ليومين بس وده هيكون له تأثير كبير في تسريع حركة التجارة الخارجية وتسهيل دخول المواد الخام والسلع.
وزارة الاستثمار والتجارة الخارجية مركزة كمان على خلق مناخ استثماري تنافسي وجاذب للمستثمرين.. سواء كانوا محليين أو أجانب.. عن طريق توفير بيئة مؤسسية وتشريعية ملائمة لتحسين بيئة الأعمال.
وكل الخطوات دي مش بس تصريحات وكلام .. ده شغل ملموس بيتم على الأرض.. الحكومة بتنفذ إصلاحات مالية ونقدية وتجارية عشان تضمن إن كل خطوة بتتحرك في سوق الاستثمار تكون في مصلحة الاقتصاد الوطني.. والسياسات دي هدفها مش بس جذب استثمارات جديدة لكن كمان تطوير القطاعات الإنتاجية عشان نوفر فرص عمل أكتر ونرفع من مستوى الإنتاج الصناعي في مصر.
طب إيه اللي ممكن نتوقعه في الأيام الجاية؟
من الواضح إن التفاوض مع "ميتسوبيشي" هيكون خطوة كبيرة لتحويل مصر لمركز تصنيع عربيات في المنطقة.. وكمان مع تنفيذ الحوافز الحكومية وتسهيل الإجراءات، المستثمرين هيفتحوا مشاريع جديدة تخلق فرص عمل وتنشط الاقتصاد.. ومش بس صناعة العربيات اللى هتتحسن لكن هيكون في نقلة نوعية في الاقتصاد كله.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
