كشف أسامة حسن، نجم الزمالك السابق، عن رسائل مرتضى منصور، رئيس النادي السابق، ضده، والتي حملت تجاوزات، حسبما أوضح.
وقال أسامة حسن عبر قناة «الكابتن التاريخي خالد الغندور» على منصة «يوتيوب»: «رسالتي الأولانية كانت في شهر 8 للمستشار مرتضى منصور، لما تجاوز في حقي وبعتلي رسائل مينفعش تتبعت على التلفيون، بعتلي رسائل تانية نفس التجاوزات على التلفيون، امبارح والنهاردة».
وأضاف: «من ضمن الرسائل بيقولي خلي ممدوح عباس ينفعك، أنا ولا قابلته ولا حاجة، الراجل عمل حاجة كويسة للنادي أعتذرت له وشكرته على اللي عمله، وأي حد هيعمل حاجة للنادي هنشكره، زي ما كنا بنشكرك لما كنت بتعمل حاجة للنادي».
وأكمل: «دلوقتي بتعمل إيه بتخرب النادي، فـ نشكرك ليه، ولا عايزين نشوفك ولا على الساحة ولا ترجع النادي».
وتابع: «شكرنا عمرو أديب، طبعًا لازم نشكره، ده كباتن النادي التاريخيين لما وقفوا ضد النادي دلوقتي، شكرًا اتمحوا، زيك النهاردة، حتى لو عملت لبن العصفور، أنا مش بخاف من حد لا منك ولا من غيرك في شهر 8 قولتلك الكلام ده، والنهاردة بقولك نفس الكلام ده، أنا محدش كاسر عيني وراسي مرفوعة على طول».
وزاد: «دي آخر رسالة هوجهالك، بلاش تجاوز. أسامة حسن مش بيخاف من حد وأنت عارف، ومش بخاف من حد، احترامًا لأولادك وأصحابي ولسنك آخر مرة هقولهالك، أوعى تفكر في يوم من الأيام تبعتلي تجاوزات تاني بالشكل ده، من النهاردة مفيش احترام بقى خلاص، أي حاجة هتعملها هتلاقي رد فعل غير عادي، أديني قولتلك».
وشهدت الساعات الماضية تراشقًا بين مرتضى منصور والإعلامي عمر أديب، بعد هجوم الثاني على خلفية تدخل الأول في قضية سحب أرض 6 أكتوبر من الزمالك.