علق مجدي عبدالغني، نجم النادي الأهلي الأسبق، على تصريحات محمود عبدالرازق «شيكابالا»، نجم نادي الزمالك السابق، بشأن تدخين بعض لاعبي الفريق الأبيض «الشيشة» قبل نهائي أفريقيا 2016.
وكان شيكابالا صرح عبر برنامج «الكورة مع فايق»، بأن ما كان يحدث خلال نهائي أفريقيا 2016 بين الزمالك وصن داونز، كان ينذر بعدم تحقيق اللقب، وعلق: «كنا 14 لاعب، وكان في اثنين لاعيبة أدخل عليهم ألاقيهم بيشيشوا في الأوضة. هل ده يعقل؟!».
وقال مجدي عبدالغني في تصريحات خلال برنامجه المذاع على قناة «الشمس»: «شيكابالا تكلم بعفوية عن موضوع (الشيشة)، وفي ناس زعلانة منه، لكن أنا بقولكم إن كلام شيكابالا صحيح، وفي لاعيبة بتشرب شيشة، ولحد دلوقتي موجود هذا الأمر».
وأضاف: «أنا شوفت بعيني لاعيبة بتشرب شيشة ومن ضمنهم واحد على اسم وزارة الكهرباء، بيقعد في مكان في المهندسين، بيشرب فيه شيشة».
وأتم: «وفي المعسكرات الخارجية كان في لاعيبة بتسيب المعسكر وتخرج تروح القهوة عشان تشرب شيشية، يعني كلام شيكابالا حقيقي، وده بسبب إن اللاعبين حاليا معاهم فلوس مش عارفين يودوها فين».