هو سعر الفايدة هيتحرك في الاجتماع اللي جاي للبنك المركزي المصري ولا فيه هيفضل ثابت بعد قرار صندوق النقد الدولي بصرف الشريحة الرابعة لمصر وقروض إضافية وايه علاقة الدولار بسعر الفايدة ولما الفايدة تنزل الناس هتستفاد ايه.
معروف إن سعر الفايدة من الأخبار الإقتصادية المهمة جدا اللي بييهتم بيها المصريين حاليا وبيزيد متابعة اخبارها قبل كل اجتماع للجنة السياسة النقدية في البنك المركزي المصري ونقد نقول إن قطاع كبير من الشعب المصري بقي عنده ثقافة مالية اكبر من الأول لأن الشأن الاقتصادي كان بطل المشهد من شهور طويلة وعرف إن سعر الفايدة ليه أهمية كبيرة على كل الأسواق يعني بياثر على استثماراته ومدخراته في البنك ولو معاه قرشين وهيعمل مشروع جديد قيمة الفايدة هتفرق معاه لانه ممكن يطلب قرض من البنك وكمان لو بيستثمر فلوسه في الدهب سعر الفايدة في البنوك هيكون ليه تأثير مباشر على مدخراته من الدهب ودا طبيعي لان كل الأسواق مرتبطة ببعضها سواء بعلاقة عكسية أو طردية.
طيب ايه اللي علاقة كلامنا عن الفايدة بقرض صندوق النقد ؟
شوف ياسيدي الحكاية ببساطة إن لجنة السياسة النقدية واللي هتجتمع يوم 17 أبريل اللي جاي هيكون قدامها أرقام كتير وبيانات ومؤشرات هتحدد بيها قراراها بخصوص سعر الفايدة وهل هتحركه أو تخفضه ولا هتثبته عند المستويات الحالية
27.25% للإيداع و28.25% للإقراض... وزي ما قلنا البيانات الرسمية هي اللي بتحدد سعر الفايدة واهمها بيانات التضخم والسيولة وتوافر الدولار.. طيب ايه علاقة التضخم أو ارتفاع الأسعار بتوافر الدولار ؟.. اكيد فيه علاقة مباشرة لأن توافر الدولار معناه زيادة في السيولة الأجنبية وزيادة المعروض النقدي وتخفيف الضغط على الجنيه وسهولة في استيراد السلع وبالتالي زيادة المعروض منها واستقرار في سوق الصرف ودا كله هيودينا في الاخر لانخفاض أسعار السلع الاستراتيجية والاساسية والانخفاض دا مكانش هيحصل لولا ان فيه إيرادات دولارية كتير ومستدامة وقرض صندوق النقد الدولي من الموارد الأساسية للنقد الأجنبي دلوقتي واخر شريحة وافق عليها الصندوق من ساعات هتوفر لمصر مليار و200 مليون دولار ودا غير قرض تاني إضافي بقيمة مليار و300 مليون دولار يعني بنتكلم في 2 مليار ونصف دولار..
يعني عشان نفهم المعادلة خفض التضخم محتاج زيادة في معروض الدولار في الأسواق وزيادة الدولار محتاج موارد دايمة زي السياحة والتحويلات والتصدير وقناة السويس والاستثمار وعرضية أو مؤقتة زي قروض المؤسسات المالية ومنها صندوق النقد الدولي اللي هيضخ 2500 مليون دولار في السوق المصري هي قيمة الشريحة الرابعة وقرض التنمية والاستدامة الإضافي..
وعامة اغلب التوقعات بتقول إن المركزي هيخفض سعر الفايدة في اجتماعه الجاي نتيجة انخفاض التضخم بشكل مستمر وزيادة معروض الدولار واستقرار التدفقات الدولارية وقرار تخفيض سعر الفايدة هيكون ليه تأثيرات إيجابية كتير على الناس وعلى النشاط الاقتصادي كله وهيعمل انتعاشة كبيرة في الإقراض وفي توسع اعمال الشركات اللي بتعتمد على التمويلات المالية الكبيرة من البنوك وهيخلق فرص عمل أكتر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
