يا ترى هو إيه اللي بيحصل لأسعار الدهب، وليه الأسعار العالمية عملت قفزات متتالية خلال الأيام الأخيرة واتأثرت بيها الأسواق المحلية في كل دول العالم، هل في أسباب سياسية رفعت أسهم الدهب للسما، ولا ده مؤشر بيأكد إن مافيش نزول تاني في أسعاره..
في الأيام الأخيرة، أسعار الذهب العالمية ارتفعت بشكل مفاجئ، وتحديدا على مدار 3 أيام، عشان يوصل انهاردة ل 3 آلاف دولار للأوقية، وده عكس التوقعات والتحليلات.
ونقدر نقول إن في أسباب كتير بتقف ورا ارتفاع أسعار الدهب بالشكل المبالغ فيه ده، واللي اولها التقارير السنوية لنسبة التضخم، وكمان تقارير نسبة البطالة اللي بتحسم المعايير اللي بتحدد أسعار الدهب.
وفي الفترة الأخيرة، حصلت حالة من التذبذب الطفيف في أسعار المعدن الأصفر، وتحديدا خلال ال 48 ساعة الأخيرة، عشان يرتفع ويرجع ينخفض تاني، عشان بعد كده يميل للتصحيح، عشان يبقي ارتفاع الأسعار بالشكل المفاجئ ده، بدوم سبب حقيقي يدفعه للارتفاع.
ولو بصينا لتوقعات المحللين بتخفيض الفيدرالي الأمريكي لسعر الفايدة خلال الفترة الجاية، ومع ترقب المحللين كمان خفض حدة الصراعات الجيوسياسية وبدء المفاوضات الجادة لإنهاء الحرب الروسية الأوكرانية، والتراجع الطفيف لنسبة التضخم، فده هينعكس بشكل إيجابي جدا على الدهب، وهيتم تخفيف الإقبال عليه كمخزن للقيمة.
خد عندك كمان، إن قرار الرئيس الأمريكي دونالد ترامب بفرض رسوم جمركية على الواردات الأمريكية من الصين والمكسيك وكندا واللي دخل بعضها حيز التنفيذ خاصة على واردات الصلب والألمونيوم، أثر على الدولار الأمريكي بشكل سلبي، وزود من مكاسب الدهب عشان يحقق ارتفاعات قياسية عالميا.
وحاليا، واضح جدا إن الصين رجعت تشتري دهب من جديد بعد فترة توقف 5 شهور ، وده أثر على سعر المعدن النفيس ولو بشكل غير مباشر، خاصة وإن الصين أتصدرت المشهد العالمي خلال شهر فبراير بعد ارتفاع احتياطي الدهب عندها ل73.61 مليون وقية، مقارنة مع 73.45 مليون أونصة في يناير.
برضو بيانات البنك المركزي الصيني أظهرت إن احتياطيات الصين من الذهب وصل ب 208,64 مليار دولار في نهاية شهر فبراير، فكل ده ساهم في رفع أسعار المعدن الأصفر بشكل كبير.
أما انعكاس الأوضاع دي على السوق المصدر، فهنقدر نقول إن حالة عدم الاستقرار في سعر الدهب العالمي، رفعت الأسعار في السوق المحلي المصري، واقترب الدهب من تسجيل أعلى قمة له، عشان عيار 21 يسجل 4200 جنيه للجرام.
ولكن في حالة استمرار اتجاه الأسعار لمنحنى الصعود، ومع استمرار السياسة الاقتصادية الأمريكية المتخبطة، فمتوقع إن سعر الدهب العالمي يحقق قفزات تاريخية متتالية على حساب الدولار وقريب جدا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
