لا دهب ولا فضة ولا عقارات .. ليه الاستثمار في الجنيه المصري دلوقتي بقي الافضل من بين كل أنواع الاستثمارات في السوق المصري.. وإزاي تستثمر في الجنيه.
أول حاجة لازم نعرف يعني إيه الاستثمار في الجنيه.. شوف ياسيدي باختصار هو الاستثمار في سوق السندات وأذون الخزانة والمعروفة بأدوات الدين، اللي بيطرحها البنك المركزي المصري نيابة عن وزارة المالية بجانب شهادت الادخار اللي بتطرحها البنوك ودا لأنك بتدفع جنيه بتاخد قصاده مكسب كبير وفكرتها ببساطة الحكومة بتطلب فلوس سلف مقابل صك أو سند وبتديك فايدة عالية شهرية ولمدة معينة متزيدش عن سنة وفي الاخر بتاخد فلوسك اللي دفتعها..
وميزة النوع دا من الاستثمار إنه بيكون بعائد كبير جدا بيوصل لـ27 % يعني لو استثمرت 100 ألف جنيه هتكسب 27 ألف جنيه في السنة ..وبتكون لوقت معلوم مش بتزيد عن سنة في ادوات الدين وفي الشهادات الادخارية بتوصل ل3 سنين كحد أقصى.... كمان ميزتها في العائد الكبير وإنك عارف هتكسب كام وامتي ومطمن على فلوسك على عكس الاستثمار في الدهب مثلا والعقارات واللي بيتعرضوا لاضرابات الأسعار وبيتأثروا بالاحداث الاقتصادية وكل يوم في سعر.
طيب خبراء الاقتصاد شايفين إيه؟
كل أهل الاقتصاد والاستثمار شايفين إن الوقت دا هو وقت الاستثمار في أدوات الدين وشهادات الادخار وهما شايفين كمان إن تراجع معدلات التضخم في مصر خلال الأشهر الأخيرة هيعزز إقبال العملاء على تجديد مدخراتهم المستحقة في الشهادات مرتفعة العائد ودا بعد إعلان أكبر بنكين في مصر وهما الاهلي ومصر استمرار إصدار شهادات الادخار ذات الفائدة 23.5 و27% سنويا.
مصادر مصرفية أكدت بعدها إن استمرار إصدار البنوك شهادات الادخار مرتفعة العائد بعد موعد استحقاقها السنوي حسم المنافسة على المدخرات لصالح الشهادات خاصة مع تراجع معدلات التضخم وتوقعات استمرار انخفاضها في الشهور الجاية وشايفين إن إصدار شهادات الادخار مرتفعة العائد هيستمر لغاية أبريل الجاي وإن الفايدة الايجابية هتكون في ذروتها خلال الربع الأول من 2025 مع استمرار تراجع التضخم.
والحقيقة سوق السندات المصرية بقى الأفضل من بين الأسواق الناشئة بعد قرار الفيدرالي الأمريكي خفض أسعار الفايدة في سبتمبر اللي فات ولأن العائد في السوق المصري بقي مغري جدًا مقارنة بأسواق تانية ولو متعرفش العوائد على أدوات الدين المصرية بتوصل لـ 20% ودي نسبة كبيرة جدا مش موجودة في أسواق تانية عشان كده حصل هجوم على سوق السندات المصرية.
ولو هنروح للأرقام هنلاقي إن البنك المركزي بالنيابة طرح نيابة عن وزارة المالية سندات الخزانة للبيع بمختلف آجالها خلال أول 10 شهور من تحرير سعر الصرف بحوالي 435 مليار جنيه بزيادة 52% عن القيمة المستهدفة البالغة 286 مليار جنيه، ودا بيورينا قد ايه الطلب على النوع دا من الاستثمار السريع والمربح واللي لسه مستمر كأفضل نوع ممكن تشغل فلوسك فيه.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
