يا ترى الدولار في مصر رايح على فين؟ وليه سعره بيتراجع بشكل ملحوظ في الأيام الأخيرة؟ وهل الجنيه ممكن يسترد وضعه من جديد؟ وإزاي اللي بيحصل ده بيأثر على دخل الأسر في مصر؟
فى الأيام الأخيرة الدولار بيتراجع بشكل ملحوظ وحاليا العملة الأمريكية بيتم تداولها عند مستوى بيتراوح ما بين 50 جنيه 40 قرش و50 جنيه و30 قرش.
وأول سؤال إيه سبب هبوط الدولار في مصر الفترة الأخيرة؟
في الحقيقة الموضوع معقد شوية.. وفيه عوامل كتير بتحكمه.. أولًا فيه تحسن ملحوظ في احتياطي النقد الأجنبي في مصر واللي بدأ يزيد بشكل ملحوظ خلال الفترة الأخيرة بسبب عوامل زي التمويلات الدولية ومناه القروض من صندوق النقد الدولي أو الاستثمارات الأجنبية اللي بدأت تدخل السوق المصري تاني.. كمان عندنا القطاع السياحي اللي بدأ يعود بشكل قوي خاصة بعد فترة الركود اللي مر بها.
لكن مش دي بس العوامل المؤثرة فى اللى بيحصل .. في عامل تاني مهم جدًا وهو السياسات المالية للحكومة والبنك المركزي.. مع التعديلات اللي حصلت في سياسات النقد وتحرير الجنيه ده ساعد على تقوية الجنيه مقابل الدولار.. يعني ببساطة السياسات دي ساعدت على تقليل الضغط على السوق المحلي.
وده طبعًا خلا الجنيه يرجع شويه من قوته المفقودة وتبدأ تتراجع أسعار الدولار في البنوك يعني مش بس البنك المركزي هو اللي قادر يتحكم في الدولار ده كمان فيه تأثير قوي للسياسات الاقتصادية اللي بتتم في مصر السنين الأخيرة.
نيجي لسؤال مهم.. إيه اللي هيحصل الفترة الجاية؟ هل الدولار هيستمر في الهبوط؟
في مؤشرات إيجابية بتقول إن الجنيه ممكن يكمل صعوده قدام الدولار في الفترة الجاية.. لكن ده مش هيكون سهل فيه تحديات كتير لسه قدامنا.. وأكبر تحدي هو الديون الخارجية اللي على مصر.. الديون دي لو زادت أكتر من كده ممكن تأثر على الاقتصاد بشكل عام وتخلي الدولار يرتفع تاني.
بس خليني أقولك حاجة مهمة استقرار الاقتصاد المصري في الفترة الأخيرة بقى فيه تحسن.. وإن كان بطيء بس بدأ يؤتي ثماره.. القطاع السياحي والتحويلات من المصريين بالخارج وكمان الاستثمارات الأجنبية كلها عناصر بتساعد على تقوية الجنيه.
لكن لازم نكون واضحين.. التراجع ده مش معناه إن الدولار مش هيرتفع تاني.. لأن أسواق الطاقة زي النفط والغاز الطبيعي لها تأثير كبير.. لو حصل أي صعود في أسعار النفط، ده ممكن يخلي الدولار يرتفع تاني قدام الجنيه خاصة في ظل العجز التجاري اللي بيعاني منه الاقتصاد المصري.
واللي بيحصل دلوقتي هو مجرد مرحلة من مراحل تصحيح الوضع الاقتصادي.. وكل ما استمرت السياسات الاقتصادية في اتجاه استقرار الأسواق وزيادة الاحتياطي النقدي هنشوف الجنيه ممكن يعزز قوته أكتر لكن في نفس الوقت، لازم نكون حذرين ونفهم إن السوق مش مستقر 100%، وعوامل زي الديون والطاقة ممكن تأثر عليه.
كلنا بنتمنى إن الاقتصاد يتحسن والدولار ما يرفعش تاني والأمور الاقتصادية تستقر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
