يا ترى هي الحكومة هتقدم هدايا للمصريين في السنة الجديدة 2025، طب الهدايا دي هتكون عبارة عن إيه، هل ممكن تبقى اتخفيض أسعار سلع معينة، ولا منح وحوافز، ولا معاشات جديدة زي تكافل وكرامة، ولا زيادة مرتبات.
دلوقتي، الحكومة المصرية بتفكر تحفف العبء عن الشعب المصري، عشان كده أعلنت وزارة التموين، عن مجموعة من الإجراءات المهمة اللي هتحصل السنة دي 2025، واللي هتشمل تثبيت أسعار السلع الأساسية وإضافة جميع المستحقين لمنظومة الدعم.
ومن هنا، قال الدكتور شريف فاروق، وزير التموين والتجارة الداخلية، إنه هيتم ضبط الأسعار قريب جدًا، رغم إن ده بيعتبرتحدي كبير لأي وزير تموين، بسبب إن في عوامل كتيرة بتأثر على الأسعار، زي أسعار المنتجات عالميًا، وسعر الصرف، وكمان سلاسل الإمداد، وغيرها من الممارسات من بعض التجار زي حبس السلع، فكل ده الوزارة هتسيطر عليه قريب عشان تخفض الأسعار.
كمان، وزارة التموين طمنت الناس بأن المخزون الاستراتيجي من السلع الأساسية في مصر آمن وزي الفل، وهيكفينا لمدة 13 شهر جاي، خاصة الزيت والسكر، وده معناه إنها مش هتغلي قريب، ومتوقع إن دعم السلع في الموازنة الجاية يزيد بمقدار 100 مليار جنيه عن القيمة الحالية، لأن الحكومة بتدرس حاليًا هيكلة منظومة الدعم بالكامل عشان يوصل لكل مستحقيه بكل عدالة.
ونقدر نقول إن سنة 2025، هتكون سنة حاسمة في هيكلة منظومة الدعم، عشان هيتم إضافة جميع مستحقي الدعم التمويني بناءً على معايير دقيقة، في حين هيتم استبعاد غير المستحقين وفقًا لمعايير دقيقة برضو.
طب بالنسبة لرغيف العيش.. هل هيكون في زيادة له قريب؟
لأ طبعا، لأن الحكومة بتدعم رغيف العيش، اللي تكلفته حاليًا جنيه ون لكن بيتم بيعه بـ20 قرش للمواطن، خاصة وإن فاتورة دعم الخبز في الموازنة الحالية مرتفعة بسبب تغير أسعار القمح، لكن الحكومة مش هتحمل المواطن أي عبء إضافي تاني.
أما بالنسبة لبطاقات التموين، فوفقًا لوزير التموين فمش هيتم المساس بالبطاقات التموينية الحالية، ومش بس كده لأن ده كمان هيتم رفع عدد المستفيدين، وبالتالي مش هيكون في تأثير على المواطن البسيط الللي يعتمد على الخبز المدعم.
أما قصة التحول إلى الدعم النقدي، يعني توزيع فلوس بدل سلع تموينية، فلسه الموضوع بيُطرح للحوار المجتمعي، واحتمال يتطبق على مراحل عشان الحكومة تقدر توصل الدعم للفئات الأكثر احتياجًا.
نيجي بقى لاستعدادات شهر رمضان 2025، فالحكومة دلوقتي أنشأت 100 100 سوق "لليوم الواحد" في جميع محافظات الجمهورية، عشان توفر السلع الأساسية بأسعار مميزة، وهيتم مضاعفة الأسواق دي لـ 200 سوق في شهر رمضان الجاي.
ونقدر نقولك إن كل الإجراءات دي اللي بتستهدفها الحكومة في 2025، هدفها مواجهة الاحتكار والسيطرة على الأسعار وتوافر السلع بأسعار مناسبة، عشان تفرح المصريين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
