يا ترى هي إزاي الحكومة المصرية بتفكر تنشط السياحة، وايه هي أدواتها عشان تزود الجذب السياحي لمصر في السنين الأخيرة، هل هتتبع سياسة مختلفة ومرنة عشان تحقق الهدف ده، طب إيه هي أرقام السياح المستهدف تحقيقها في الفترة الجاية.
طبعا السياحة واحدة من أهم مصادر الدخل القومي لأي بلد، وتحديدا في مصر، لأننا بنملك تلت آثار العالم، عشان كده الحكومة المصرية ممثلة في وزارة السياحة والآثار وكمان وزارة الطيران، قررت تطبق خطة من العيار التقيل عشان تنشط السياحة بشكل أكبر، وتقدر تستهدف 30 مليون سائح بحلول سنة 2028.
ومش بس كده، لأ ده كمان هتقدر توفر العملات الأجنبية للسوق المصري، وتعمل مساندة قوية للاقتصاد وتنهي بشكل تدريجي أزمة الدولار.
عشان كده، وزارة الطيران المدني أخدت خطوات جادة وقوية عشان تعزز الربط بين الوجهات السياحية المصرية، وتقدر تنشط الحركة الجوية والسياحية، وبالفعل بدأت في تدشين خطوط طيران منتظمة، بتربط بين مختلف المحافظات، وكمان بين كل دول العالم.
غير كده، وزارة الطيران بتنفذ دلوقتي الاستراتيجية الوطنية لتنمية الحركة السياحية الوافدة لمصر، واللي هدفها اننا نوصل ل 30 مليون سائح في السنين الجاية.
ومن بين الإجراءات اللي بتنفذها وزارة الطيران عشان تقدر توصل للهدف ده في فترة زمنية قليلة، هي زيادة أو تعزيز الحركة الجوية للمدن السياحية المصرية، فبيتم الاستغلال الأمثل لأسطولنا الجوي والتوسع في شبكة خطوطنا محليًا ودوليًا، وده طبعا بطريقة تتماشى مع احتياجات المسافرين وتقدر تدعم جهود التنمية الاقتصادية.
كمان، دلوقتي أسطول النقل الجوي المصري بيضاعف من عمليات التشغيل وبيفتح أسواق جديدة له في كل دول العالم، عشان يقدر يساهم في تنشيط السياحة ويعزز من مكانة مصر ووضعها كمقصد سياحي عالمي لملايين السياح من كل دول العالم.
غير كده، فالوزارة عملت خطة بره الصندوق من خلال شركة "إير كايرو"، وهي إنها تطرح رحلات طيران منخفضة التكاليف، عشان تقدر تناسب فئات مختلفة من الشعوب في كل دول العالم، يعني بيكون في أسعار وخدمات تنافسية عشان نزود الحركة السياحية، كمان الشركة بتقدم خيارات سفر كتيرة بتسهل على السائحين الوصول لأهم مناطق الجذب السياحي، عشان نضمن لهم تجربة سفر فريدة ومختلفة ومتكاملة.
والكلام ده حرفيا، اترجم على أرض الواقع، والدليل إن جداول تشغيل الطيران شهدت ارتفاع كبير فى عدد الرحلات الداخلية والخارجية خلال الفترات الأخيرة، ومش بس كده، ده كمان شركة "إيركايرو" هتزود أسطولها ل 40 طائرة بحلول شهر مارس 2025، عشان تقدر تقدم دورها في بدعم وتنشيط الحركة الجوية والسياحية الوافدة لمصر.
ضيف عندك، إن طيران الشركات الوطنية، زي "مصر للطيران" استلمت الدفعة الأولى من صفقة ال 18 طيارة بوينج طراز 737 ماكس 8، وكمان اشترت 10 طيارة إيرباص طراز إيه 350-900، عشان تقدر تنقل أكبر عدد من السياح من وإلى مصر في الفترة اللي جاية.
وأخيرا، وزارة المالية قررت توفر 20 مليار جنيه لمصر للطيران عشان ندعم أسطولها، اللي هو أصلا الناقل الأول للسياح المترددين على مصر، والتمويل ده حصل بناء على الطلب المتزايد على السفر الجوي، اللي اضطر مصر للطيران لزيادة حجم أسطولها ل 125 طيارة خلال ال 5 سنين الجاية، مقابل 65 طائرة حالياً.
وطبعا الخطة اللي اتكلمنا عليها دي، هتستهدف نقل أكبر عدد من والسائحين من وإلى مصر بشكل دوري، وهنقدر توفر سيولة دولارية كبيرة جدا، هتنعش اقتصاد البلد من ناحية، وتقضي على أزمة الدولار من ناحية تانية، وده المطلوب تحقيقه في الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
