يا ترى ليه الرئيس الأمريكي دونالد ترامب شن هجوم عنيف على بنك الاحتياطي الفيدرالي ؟ وهل فعلا عاوز يخفض الفايدة عشان مصلحته ؟ وليه هاجم رئيس الاحتياطي الفيدرالي جيروم باول في وقت حساس زي ده؟ وهل فعلاً الفيدرالي الأمريكي فشل في محاربة التضخم؟
الاقتصاد الأمريكي مش سهل واللي بيحصل فيه مؤثر مش بس على أمريكا لكن على العالم كله.. لو كنت متابع للي بيحصل في أمريكا، أكيد سمعت عن التوترات بين الرئيس الأمريكي دونالد ترامب وبنك الاحتياطي الفيدرالي الأمريكي أو الفيدرالي الأمريكي زي ما بنسميه.. الصراع ده مش جديد لكنه مشهُود بشكل كبير دلوقتي.
طب إيه اللي بيحصل بالظبط؟
في الأيام اللي فاتت كان في تصعيد كبير بين الرئيس الأمريكي ترامب ورئيس الاحتياطي الفيدرالي جيروم باول.. خصوصاً بعد ما الفيدرالي قرر يثبت أسعار الفائدة من غير ما يدي إشارات عن أي تغيير في السياسة النقدية.. ده كان قرار مهم جداً، لإنه بيؤثر على الاقتصاد الأمريكي بشكل مباشر.. لكن ترامب زي ما عوّدنا ما سكتش وقال إنه مش عاجبه قرار الفيدرالي.
ليه ترامب مش راضي عن الفيدرالي؟
ترامب كان واضح في انتقاداته وقال إن الفيدرالي أساء إدارة النظام المصرفي بشكل كبير وإنهم فشلوا في احتواء التضخم اللي هو من أهم المشاكل الاقتصادية اللي واجهت أمريكا في الفترة الأخيرة.. وأكد كمان إنه هيشيل بعض القوانين والقيود المالية علشان يسهل الإقراض للأمريكيين والشركات.
لكن إيه رد الفيدرالي على انتقادات ترامب؟
جيروم باول كان هادئ جداً وقال إنه مش هيعلق على كلام الرئيس الأمريكي هو بيؤكد دايماً إنه لا يرد على الانتقادات السياسية لأن دي مش مهمته.. باول شدد على أن الفيدرالي بيعمل بمهنية وبيستخدم الأدوات النقدية المتاحة ليه علشان يحافظ على استقرار الاقتصاد ووضح إنه حالياً التركيز هو تقليل التضخم وفي نفس الوقت عدم التأثير على سوق العمل.
لكن في نقطة مهمة جداً بيقولها باول: سياسة الفيدرالي حالياً أقل تشديداً من قبل كده يعني هو مش شايف إن أسعار الفائدة لازم ترتفع زي ما كان بيحصل من قبل.. لكن في نفس الوقت هو مش مستعد يخفض الأسعار بشكل كبير قبل ما يتأكد إن التضخم تحت السيطرة تماماً.
طيب إيه تأثير ده على السياسة النقدية في أمريكا؟
النزاع ده بين ترامب والفيدرالي مش مجرد خلاف شخصي ده بيأثر بشكل مباشر على الاقتصاد الأمريكي.. الفيدرالي مش راضي يرضخ لضغوطات ترامب علشان يخفض أسعار الفائدة وده لأنهم مش عايزين يأثروا على الاستقرار المالي. لو الفيدرالي بدأ يخفض الفائدة بسرعة، ده ممكن يتسبب في زيادة التضخم بشكل أكبر ويأثر على قوة الدولار.
على الناحية التانية ترامب شايف إن تخفيض الفائدة هو الحل السريع لتعزيز الاقتصاد، خصوصاً مع اقتراب الانتخابات الرئاسية.. وده طبعاً بيخلق وضع حساس لأنه قد يؤثر على نتائج الانتخابات بشكل مباشر، خصوصاً لو الاقتصاد الأمريكي ما كانش في أفضل حالاته.
هل فيه أي خطر على الفيدرالي من تصرفات ترامب؟
ترامب قال إنه مش ناوي يقيل باول من منصبه رغم الانتقادات المستمرة.. لكن ده مش معناه إن الفيدرالي مش هيواجه تحديات.. كل ما استمر الهجوم السياسي على سياسات الفيدرالي كلما زادت الضغوط عليه لتغيير استراتيجياته.
في النهاية.. الصدام بين ترامب والفيدرالي الأمريكي هو معركة بين السياسة الاقتصادية والواقع المالي.. ترامب عايز يضغط لخفض الفائدة علشان الاقتصاد ينشط قبل الانتخابات بينما الفيدرالي مُصر على الحذر وعدم الإفراط في التحفيز.. والفائز في النهاية هيكون الاقتصاد الأمريكي نفسه اللي هيتأثر بكل خطوة سواء في اتجاه زيادة الفائدة أو تخفيضها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
