هو ليه الذكاء الاصطناعي بقى مؤشر لتقدم دول كتيرة في الفترة الأخيرة، ومقياس للتنمية الاقتصادية كمان، وإيه هي خطة مصر عشان تقدر تطور نفسها في المجال ده وتعتمد عليه بشكل كبير في تحقيق التنمية المستدامة اللي مستهدف نحققها في 2030، وهل في أي بوادر حصلت من دلوقتي ولا لسه شوية؟
في الحقيقة، الذكاء الاصطناعي بقى محور مهم من محاور التنمية الاقتصادية، عشان كده مصر دلوقتي بتحاول تسخره عشان تخدم التنمية والازدهار، وتقدر تحقق رؤيتها لمستقبل اقتصادي وتكنولوجي أفضل.
ومن هنا، اتكلمت الحكومة عن الموضوع ده، ممثلة في الدكتورة رانيا المشاط، وزيرة التخطيط والتنمية الاقتصادية والتعاون الدولي، وقالت إن الذكاء الاصطناعي مهم جدا على المستوى الوطني، وبيشغل اهتمام الحكومات وصناع القرار على الصعيد العالمي خاصة في السنين الأخيرة، والدليل إن اجتماعات المنتدى الاقتصادي العالمي بدافوس لسنة 2025، كان الذكاء الاصطناعي والتطورات التكنولوجيا قضية رئيسية للمناقشات في المحفل العالمي المهم ده.
عشان كده، الحكومة المصرية قررت تعزز إمكانيات الذكاء الاصطناعي في مصر، عشان تقدر تواكب العالم من ناحية، وكمان تحقق التنمية المستدامة من ناحية تانية، عشان تقدر تحقق التوازن بين احتياجات الحاضر ومتطلبات الأجيال الجاية، وده في ظل وجود تحديات متزايدة ومتشابكة على الصعيد الاقتصادي والبيئي والاجتماعي.
كمان، الذكاء الاصطناعي بيقدر يفتح مجالات واسعة لتسريع النمو وتحقيق قفزات نوعية في كل المجالات، وبيطرح حلول للتحديات التنموية المعقدة في أي بلد، مش مصر بس.
ضيف على ده، إن الأمم المتحدة بتأكد دايما على الدور الحاسم للذكاء الاصطناعي في تحقيق أهداف التنمية المستدامة، خاصة وإن حجم مساهمة الذكاء الاصطناعي في الاقتصاد العالمي هيوصل لأكثر من 15 تريليون دولار بحلول سنة 2030.
وحاليا، مصر عملت استراتيجية وطنية للذكاء الاصطناعي، واللي بتهدف لتعزيز استخدام التكنولوجيا دي في جميع القطاعات، خاصة وإن الرئيس عبدالفتاح السيسي، اتكلم عن الموضوع ده خلال إطلاق الإصدار الثاني من استراتيجية مصر للذكاء الاصطناعي 2025-2030.
والريس أكد كمان على أهمية استكمال المسيرة نحو بناء مجتمع رقمي يتبنى أحدث التكنولوجيات العالمية، ويقدر يشكل فيه الذكاء الاصطناعي محور أساسي لجهود التنمية، خاصة وإن تأثيره بقى واضح جدا في جميع مناحي الحياة، وده بيتيح لنا فرص غير مسبوقة للتقدم والنمو المستدام.
وبناء على كلام الريس، فالحكومة قررت تنفذ التوجيهات دي من خلال استراتيجية، يقدر فيها الذكاء الاصطناعي يساهم في تحسين الكفاءة الإنتاجية في كل القطاعات، زي الصناعة والزراعة والخدمات وغيرها، وكمان عشان يقدر يدعم اتخاذ قرارات أكثر دقة وفعالية بفضل قدرته على تحليل البيانات الضخمة، وإيجاد حلول مبتكرة للتحديات اللي بتواجهنا في كل المجالات.
كمان، مصر مهتمة جدا بتطوير بنيتها التحتية الرقمية لتهيئة البيئة المناسبة لنمو تطبيقات الذكاء الاصطناعي، وبناء اقتصاد رقمي قوي ومستدام، وده هيكون من خلال الاستثمار في شبكات الاتصالات، ومراكز البيانات، والحوسبة السحابية، ورفع كفاءة العنصر البشري.
وقريب جدا مصر هتقدر تستفيد من موقعها الاستراتيجي عشان تكون مركز لعبور البيانات حول العالم، وتقدر تكون قريب وجهة مثالية لتطوير مصادر الطاقة المتجددة، زي طاقة الرياح والطاقة الشمسية، وده هيقدر يمنحها مزايا تنافسية فريدة لتلبية الاحتياجات المتزايدة في المجال ده، خاصة وإنه بيمثل ثورة تقنية هائلة وعنصر أساسي لتحقيق النمو الاقتصادي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
