أكد الإعلامي عمرو أديب، أن أي دولة لن تستطيع أن تواجه تحركات الرئيس الأمريكي دونالد ترامب وحدها، مشيرا إلى أنه يتعامل مع الأمور كتاجر.
وقال أديب خلال برنامج "الحكاية" المذاع على قناة "إم بي سي مصر": "آخر مرة سمعت كلام على القدس أمتى؟ الناس خلاص أنت بتتكلم في أنه طيب شوية الفلسطينيين دول يقعدوا في حته وياكلوا ويشربوا وخلاص والقدس موجودة اللي عايز يبقي يروح وخلاص".
وأضاف: "هيتم تنفيذ كل شيء وينتهي كل شيء، إحنا مبنتكلمش في وقت بعيد أي حد هيبقى لوحده لن يستطيع مواجهة ترامب، وهو مستعد بتمن مناسب لكل طرف أن يقوم بتمهيد الأرض تماما للإسرائيليين".
وتابع: "الراجل عمل عمله غريبة جدا، أوكرانيا اللي هي بتحارب روسيا وكانت أمريكا وراها وصرفت المليارات النهاردة طلع قالك ايه؟ حاجة لا يمكن حد يفكر فيها وفجأة دلوقتي قال ايه؟ قالهم على فكرة بقي انا مش هدي مساعدات تانية لأوكرانيا إلا لما تدونا جزء كبير من المعادن الثمينة اللي عندكم".
وواصل: "قالك أنا هفضل أصرف كده ببلاش؟ أي سلاح أديهولك بعد كده أخد قدامه دهب أو فضة أو منجنيز تاجر رسمي أنت مصدق هو بيفكر إزاي؟".
وأكمل: "أنا اللي يهمني مصر والمنطقة بتاعتنا ولو اتعاملنا كل واحد لوحده وكل واحد يارب نفسي هتضطر تقبل بأشياء لا يمكن أن تقبل بها أو هتكون تحت ضغط كبير، أنت شوفت في الـ48 ساعة الأخيرة كان الضغط إزاي ولكن أنت عشان قوي وموقف واحد موحد لا".
وذكر: "أنا بكلمك على الرأي العام المصري الحقيقي بيقولك لا، المصريين العاديين اللي موجودين في الشارع كانوا بيقولوا لا والمعارضين لمصر برة وجوة كانوا بيقولوا لا وقيادة مصر قالت لا بشكل عالي الصوت وواضح جدا".
واختتم: "تحملت هذا الضغط هو رايح يعمل ضغط من حته تانية وتالتة ورابعة، خد بالك من حاجة هو هيمسكك من أيدك اللي بتوجعك ومش مصر بس أي حد هيمسكه من ايده اللي بتوجعه، ولكن لما نبقي ايد واحدة هتبقي قوية".
