قدمت وحدة أبحاث بانكير، عدد من التقارير العالمية والمحلية على مدار الساعات الأخيرة، والتي تناولت خلالها أهم القضايا التي تشغل المواطنين في الشأن الاقتصادي والمالي.
وشرح التقرير إن الرئيس الأمريكي دونالد ترامب فجّر قنبلة اقتصادية لما قرر يفرض رسوم جمركية ضخمة على واردات المكسيك، كندا، الصين، وتهديد الاتحاد الأوروبي برسوم جديدة.
ولفت التقرير إن الرسوم دي معناها إن أي منتج جاي من الدول دي لأمريكا هيبقى أغلى ودا ممكن يغير شكل التجارة العالمية تماما.
وشرح التقرير دوافع قرارات ترامب وقال إنه شايف إن أمريكا بتستورد بضايع بمليارات الدولارات من الدول دي.. لكن في المقابل الصادرات الأمريكية ليهم مش بنفس القوة وده بيخلي أمريكا عندها "عجز تجاري" ضخم.
وكشف التقرير مدى استفادة الاقتصاد الأمريكي من قرارات ترامب وشرح إن المنتجات الأجنبية لما هتكون أغلى.. الناس في أمريكا هتقلل استيرادها وده هيقلل الطلب على العملات الأجنبية زي اليوان الصيني أو اليورو الأوروبي.. في المقابل، هيزيد الطلب على الدولار.
وقال التقرير إن قرارات ترامب ليها عواقب لأن الدول المتضررة مش هتسكت.. الصين مثلا أعلنت إنها هترد بفرض رسوم على المنتجات الأمريكية.. وده هيأثر على شركات أمريكية ضخمة بتصدر للصين زي آبل وتسلا.. وكندا والمكسيك كمان مش هيعدوا الموضوع مرور الكرام وبدأوا يخططوا لردود انتقامية ممكن تضرب الاقتصاد الأمريكي.. وكل ده معناه إننا داخلين على حرب تجارية ضخمة.. والنتيجة ممكن تكون كارثية لو استمرت الدول في التصعيد ضد بعض.
التقرير التالي اللي قدمته منصات بانكير كان حولين الاستثمارات الكويتية الضخمة في مصر خلال الفترة الجاية..
وأشار التقرير إنه في الساعات الأخيرة، وزير الاستثمار استقبل مستثمرين كوايتة، من شركة "بودي الكويتية"، اللي عايزة تخش بتقلها في مجال المطارات، خاصة وأنها بتمتلك "طيران الجزيرة" في مصر، عشان كده عايزة تبدأ تشتغل 7 مطارات، واللي بينها مطار العلمين وكمان مطار الغردقة.
وشرح بانكير إنه بعد إعلان الحكومة المصرية نيتها لدراسة المشروع عشان تشوف آلية التنفيذ في أسرع وقت والمكاسب اللي هتدخل خزينة الدولة من المشروع، فاجئتنا كمان اللجنة التجارية المصرية الكويتية، وخاصة خليفة عبدلله العجيل العسكر، وزير التجارة والصناعة الكويتي، بطلب تعاون تجاري جديد مع مصر، واللي هيتجسد في شراكات عملاقة.
وشرح التقرير أن التعاون ده هيكون في شكل اتفاق تجاري وصناعي بين البلدين، عشان يساهم في خلق مناخ من التواصل الدائم، وكمان هيزود التبادل التجاري، ده غير تدشين شراكات اقتصادية جديدة من خلال المشروعات الاستثمارية في البلدين، وهيتم ضخ استثمارات بالملايين، وأولها هيكون في قطاع التكنولوجيا الحديثة خاصة في ظل الثورة الصناعية الرابعة.
منصات بانكير قدمت تقرير مختلف عن مفاجأة الحكومة للشعب قبل رمضان
وقال التقرير إن الرئيس السيسي في كل مناسبة بيتكلم عن صبر المصريين وازاي استحملوا تبعات الأحداث الاقتصادية الناتجة عن الأحداث اللي حولينا في المنطقة ووجه الشكر اكتر من مرة للمصريين وفي نفس الوقت كانت تعليمات الرئيس السيسي المباشرة للحكومة بالتخفيف عن المواطنين قدر الأمكان ورغم أن الدولة بتمر بظروف صعبة كلنا عارفينها لكن الحكومة بتنتهي حالياً من وضع اللمسات الأخيرة لحزمة حماية اجتماعية جديدة بناء على تعليمات الرئيس.
وقال التقرير إنه من ساعة إعلان الدكتور مصطفى مدبولي رئيس الحكومة عن تجهيز الحزمة الجديدة والناس بتسأل على معادها لغاية ما طلع المستشار محمد الحمصانى، المتحدث باسم مجلس الوزراء وفجر مفاجأة وقال إن الاجتماع الأخير للدكتور مصطفى مدبولى رئيس الوزراء كان لدراسة تصورات وزارة المالية والتضامن الاجتماعى للحزمة الاجتماعية الجديدة.
وقال التقرير إن الحمصانى قال إنه تم شرح تصورات كل جهة وصدرت توجيهات رئيس الوزرا بالانتهاء من الشكل النهائى لتصور الحماية الاجتماعية خلال الايام القليلة اللي جاية وبعدها هيتم عرضها على الرئيس السيسى قبل إقرارها وإعلانها.
ولفت التقرير إنه في نفس الوقت الدكتور فخري الفقي، رئيس لجنة الخطة والموازنة بمجلس النواب طلع وقال ان الحزمة الأساسية هتكون في الموازنة العامة للدولة مع بداية كل موازنة جديدة، وإنه في العادة بيتم تبكير صرف الحزمة الاستثنائية سواء زيادة في مرتبات العاملين بالدولة أو غيرها كمان بتنطبق على القطاع الخاص، بالإضافة إلى زيادة المعاشات وزيادة الحد الأقصى للأجور.
وأكد الفقي إن زيادة المرتبات والمعاشات هتكون في أول مارس اللي جاي بالتزامن مع دخول شهر رمضان، وبكده هيتم التبكير بزيادة المرتبات والمعاشات 4 شهور قبل بداية السنة المالية الجديدة في شهر يوليو الجاي.
التقرير الأخير اللي قدمته وحده أبحاث بانكير كان بخصوص جهود مصر لتصدير الدهب..
وشرح بانكير إن مصر في الفترة الرئاسية الجديدة بتستهدف تطوير الصناعة بشكل كامل، وتشجيع الاستثمارات الأجنبية علي الدخول للسوق المصري، وفعلا الدولة المصرية في الفترة الأخيرة بقت هدف رئيسي لرؤوس الأموال الأجنبية واللي دخلت مصر بشكل كبير بفضل الحوافز والتسهيلات الكبيرة اللي قدمتها الدولة المصرية.
وقال التقرير إن صناعة الذهب واحدة من الحاجات اللي كانت في الفترة اللي فاتت بعيدة تماما عن السوق المصري، لكن مع تطوير الصناعة ، مصر بدأت عصر جديد، وفي عدد كبير من كبريات الشركات العالمية بدأت تدخل السوق المصري، وتنتج أنواع واشكال جديدة من انواع المشغولات الذهبية واللي عليها اقبال وطلب عالمي واغلب شغلها بيكون مخصص للتصدير للخارج.
وتابع التقرير إنه في الفترة اللي فاتت الحكومة أعلنت عن وضع استراتيجية وطنية لزيادة صادرات مصر من الذهب، وفعلا صادرات مصر من الذهب والحلي والأحجار الكريمة ارتفعت بنسبة 84% في أول 10 أشهر من 2024، وفي 5 دول رئيسية هيا اللي بتستحوذ علي نسبة 99.8% من إجمالي صادرات مصر من الذهب والحلي والأحجار الكريمة أولهم الامارات العربية المتحدة واللي بتاخذ نسبة 62.7% من إجمالي صادرات مصر من الذهب والحلي والأحجار الكريمة بقيمة 1.654 مليار دولار.
وقال التقرير إن الاستراتيجية الوطنية لزيادة صادرات مصر من الذهب والحلي بتستهدف أن مصر تكون واحدة من أكبر مصدري الذهب عالميا، خصوصا أن مصر في الفترة اللي فاتت قدرت تحقق مراكز متقدمة في صادرات الذهب، وتقدمت 50 مركزا في التصنيف العالمي، وحاليا مصر في الرتيب 54 عالميا في 2023 و بتستهدف كمان أن مصر تتحول لواحدة من أهم 20 مصدر للمشغولات الذهبية في 2026.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
