يا ترى ليه أوكرانيا بتفكر تفتح مركز لوجستي في مصر لتوريد المنتجات الزراعية؟ وإيه أهمية الخطوة دي لمصر؟ وإزاي هتفيدنا في تأمين احتياجاتنا الغذائية؟
وزير الزراعة الأوكراني فيتالي كوفال أعلن إن بلاده بتدرس إمكانية إنشاء مركز لوجستي في مصر لتوريد المنتجات الزراعية الأوكرانية للمنطقة.
وزي ما كلنا عارفين أوكرانيا معروفة بإنتاجها وتصديرها للحبوب والبذور الزيتية والزيوت النباتية وبتسعى خلال الفترة الأخيرة لتعزيز وجودها في سوق شمال أفريقيا خصوصا بعد التغيرات السياسية في المنطقة.
كوفال اللي بيزور مصر حاليًا، قال إنه بناءً على تعليمات الرئيس الأوكراني فولوديمير زيلينسكي.. بيستكشفوا إمكانية إنشاء مركز غذاء في مصر.. وتفقد هو والسفير الأوكراني في مصر البنية التحتية للموانئ والمواقع اللي ممكن الشركات الأوكرانية تقيم فيها مرافقها زي المصاعد ومراكز الخدمات اللوجستية والمستودعات.
طيب، إيه أهمية المركز ده لمصر؟
المركز ده لما يتعمل هيعزز من تأمين احتياجات مصر الغذائية، خاصة في الحبوب زي القمح والذرة.. مصر بتعتبر من أكبر مستوردي القمح في العالم.. وأوكرانيا كانت واحدة من الموردين الرئيسيين لينا في موسم 2023-2024، أوكرانيا صدرت لمصر حوالي 3.87 مليون طن من الذرة و1.72 مليون طن من القمح.
كمان وجود مركز لوجستي في مصر هيقلل من تكاليف النقل والتخزين.. وده ممكن ينعكس على أسعار المنتجات الزراعية في السوق المحلي.. و ده هيسهل وصول المنتجات دي لدول تانية في المنطقة وهيعزز دور مصر كمركز إقليمي للتجارة.
بالاضافة لكده.. التعاون ده ممكن يفتح فرص للاستثمار المشترك بين مصر وأوكرانيا في مجال الزراعة والصناعات الغذائية… واوكرانيا مش عاوزة شغلها فى مصر يقتصر على تصدير المواد الخام بس.. لكن كمان استخدام المناطق الاقتصادية الخاصة في مصر لمعالجة المنتجات زي إنتاج الدقيق والمكرونة ومنتجات تانية.
والخطوة دي ممكن تساهم في تعزيز الأمن الغذائي لمصر خصوصا في ظل التحديات العالمية زي التغيرات المناخية والأزمات السياسية اللي بتأثر على سلاسل التوريد.
وخد بالك إنشاء المركز اللوجستي ده هيكون خطوة استراتيجية لتعزيز التعاون بين مصر وأوكرانيا في مجال الزراعة وهيعود بالنفع على الاقتصاد المصري وتأمين احتياجاتنا الغذائية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
