هو ليه الحكومة المصرية بتراهن على قطاع الصناعة دلوقتي، هل بتفكر تخليه قاطرة التنمية في الفترة الجاية ولا ده مجرد اهتمام عادي زي ما بيحصل في اي قطاع تاني، طب إيه قصة تحويل مصر إلى وجهة صناعية واستثمارية في الفترة الجاية؟
في الحقيقة، قطاع الصناعة واحد من أهم القطاعات اللي بتعول الحكومة المصرية عليها الفترة الجاية، فحاليا بتحل مشاكل المصانع المتعثرة وبتعيد فتح المصانع المقفولة وكمان بتحل مشاكل الصناع والمستثمرين في المجال ده.
عشان كده، بقى في اهتمام كبير بالمناطق الصناعية، واللي بتعتبر من الأدوات الأساسية لجذب الاستثمارات، سواء المحلية أو الأجنبية، فبيتم توفير مناطق صناعية عالية الجودة والتكنولوجيا لأنها بتعتبر دلوقتي ضرورة ملحة لتحقيق القدرة على جذب رأس المال، وبالتالي دفع عجلة الاقتصاد المصري وتحقيق انتعاشة قوية.
والأرقام بتقول إن محافظة القاهرة بتستحوذ على 14% من إجمالي عدد المناطق الصناعية، بواقع 25 منطقة صناعية، خاصة وإن عدد المناطق الصناعية في مصر وصل ل 177 منطقة في 26 محافظة، وده وفقًا لقاعدة بيانات الهيئة العامة للتنمية الصناعية.
كمان، الحكومة بتقوم بدعم الشركات الناشئة عشان تقوي وجودها في السوق، وتقدر تحقق أهداف النمو والتنمية المستدامة، وده مع توطين الصناعة وزيادة تنافسية المنتجات المصرية.
والكلام ده معناه إن قطاع الصناعة في مصر شهد طفرة كبيرة خلال السنين الأخيرة، بفضل جهود وزارة التجارة والصناعة في إطار استراتيجية الدولة لدعم الاقتصاد الوطني، وخاصة خلال توطين الصناعة وزيادة تنافسية المنتجات المصرية محليًا وعالميًا.
وعلى مدار السنوات الماضية، وتحديد منذ سنة 2014، حققت الدولة المصرية إنجازات كتيرة وملموسة في ملف تطوير قطاع الصناعة، وده لأن القيادة السياسية حطت هدف توطين الصناعة محليًا قدامها، وده بالإضافة لاستراتيجية جذب المزيد من الاستثمارات، عشان تبقى مصر في المستقبل القريب وجهة صناعية واستثمارية أمام كل مستثمري العالم، وهو ده المطلوب.
ضيف على كل ده المبادرة الوطنية "ابدأ" للنهوض بالصناعة المصرية، واللي هدفها هو توطين الصناعة الوطنية، وتنفيذ أكبر المشروعات الصناعية ذات القيمة المضافة المرتفعة، وكمان تمكين القطاع الخاص مع الدولة لخلق كيانات اقتصادية قوية.
برضو، من أهداف المبادرة هو توفير فرص عمل للشباب والقضاء على البطالة، والمساهمة فث زيادة الإنتاج المحلي، وتوفير الموارد الأجنبية والعملة الصعبة، وكمان إضافة استثمارات جديدة بقيمة 200 مليار جنيه.
والمبادرة دي بتوفر حوالى 150 ألف فرصة عمل، وهتساهم في زيادة حجم الاستثمارات الصناعية، خاصة وأنها بتركز على الصناعات للسلع والمنتجات اللي بتعتمد على الواردات، وإنتاج مستلزمات الإنتاج والمنتجات اللي بيتم استيرادها، وقريب جدا هنشوف كل ده مطبق وموجود على أرض الواقع.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
